8 Dhjetori, 31 vjet nga lëvizja studentore që çoi në rrëzimin e diktaturës

Sot, më 8 dhjetor, shënohet 31-vjetori i ditës kur në Qytetin Studenti nisën protestat kundër regjimit komunist, që çuan më pas në vendosjen e pluralizmit politik në Shqipëri.

Një ndër kërkesat e para të studentëve ishte heqja e emrit të Enver Hoxhës nga Universiteti i Tiranës, por konteksti politik i kohës, rënia e murit të Berlinit dhe fundi i luftës së ftohtë, kërkonin ndryshime më të thella në Shqipëri.

Me thirrjen e njohur, “E duam Shqipërinë si gjithë Europa!”, të rinjtë studentë, kërkuan vendosjen e pluralizmit politik, mbajtjen e zgjedhjeve të lira dhe integrimin në Europë, duke hapur kështu një kapitull të ri në historinë e Shqipërisë.

Dita Kombëtare e Rinisë, u shpall e tillë nga Kuvendi i Shqipërisë më 8 dhjetor të vitit 2009, për të kujtuar e nderuar lëvizjen e studentëve në dhjetorit e vitit 1990, e cila ishte fillimi i fundit për regjimin komunist.