Ibrahimovic zgjedh futbollistin dhe sportistin më të mirë në histori

Foto: Getty Images

Zlatan Ibrahimovic edhe një herë nuk ka lënë askënd indiferent. Sulmuesi i Milanit në një prononcim për Corriere dello Sport ka zgjedhur futbollistin më të mirë në histori.

Fillimisht Ibra bëri me dije se Muhamed Alin është sportisti më i madh i të gjitha kohërave, duke u shprehur se zgjedhja e tij nuk i referohet vetëm dhe ekskluzivisht sportit, por edhe sjelljes dhe ndikimit jashtë fushës.

“Për shkak të karakterit të tij, personalitetit dhe sa i fortë ishte. Ai thoshte gjëra dhe i kthente në vepra”, pohon sulmuesi suedez.

Më pas pyetja është fokusuar te futbolli, ku Ibra nuk ka asnjë dilemë.

“Për mua, Ronaldo Fenomeni është më i mirë. Më i mirë se Maradona? Nuk e kam parë Maradonën. Ndoshta për gjeneratat e tjera ai është më i forti nga të gjithë. Por Ronaldon e kam takuar dhe e kam parë si fëmijë, e kam imituar. U përpoqa, por nuk ia dola sepse nuk isha i shpejtë si ai”, ka thënë Ibra.

LEXO EDHE  Anglia nën ‘këmbët’ e Brojës/ ‘The Sun’ artikull për shqiptarin

Interesant është fakti se në debat nuk hynë as Cristiano Ronaldo dhe as Leo Messi. Por më pas e pyetën për ta:

“Ata janë të dy shumë të fortë. Do të ishte një zgjedhje e vështirë. Nëse më duhet të them, atëherë zgjedh Messin sepse kam luajtur me të, e kam parë nga afër dhe e di që gjithçka që ka është një dhuratë e natyrës dhe krejtësisht e lindur ”, tha Zlatan.