Gjyqtarja e Gjykatës së Tiranës, Vjosa Zaimi do të përballet të martën më 7 dhjetor me Komisionin e Pavarur të Kualifikimit. Procesi i saj i vetingut po kryhet nga trupa e përbërë nga Etleda Çiftja, Pamela Qirko dhe Roland Ilia.
Vjosa Zaimi përfundoi studimet në Shkollën e Magjistraturës në vitin 2003 dhe u emërua gjyqtare në Gjykatën e Kolonjës. Në vitin 2008, ajo u transferua në Gjykatën e Korçës dhe prej vitit 2012 e ushtron funksionin në Gjykatën e Tiranës.
Analiza e pasurisë është një ndër tre shtyllat e rivlerësimit për gjyqtarët, së bashku me kontrollin e figurës dhe vlerësimin e aftësive profesionale. Skeda grafike e mëposhtme paraqet ndryshimin e pasurisë së deklaruar nga gjyqtarja Vjosa Zaimi nga viti 2003 deri në fund të vitit 2016. [Kliko për skedën në PDF].
Në deklarimin për herë të parë në vitin 2003, gjyqtarja Vjosa deklaron një shtëpi banimi në pronësi të familjes me vlerë 1.5 milionë lekë, ndërsa në fund të vitit 2016, pasuria e saj familjare kap vlerën e 15.4 milionë lekëve.
Ajo zotëron familjarisht pasuri të paluajtshme me vlerë 13.9 milionë lekë, automjet me vlerë 1.1 milionë lekë si dhe likujditete bankare prej 279 mijë lekësh.
Të ardhurat familjare për periudhën e deklaruar janë 25.6 milionë lekë, nga të cilat gati 47 për qind kanë si burim pagën e saj si gjyqtare dhe 44 për qind pagat e familjarëve.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga kontrolli aritmetik/logjik për 13 vite të deklarimit, njëra prej deklaratave rezultoi me probleme.
Subjekti Vjosa Zaimi në vitin 2007 rezulton me burime të pamjaftueshme financiare lidhur me shtimin e pasurisë në vlerën 368,465 lekë. Për këtë vit, subjekti deklaron pagën e saj dhe të ardhura nga interesat e depozitës, por nuk deklaron të ardhura të bashkëshortit.
Në vitin 2013, subjekti deklaron një hua me vlerë 4,700,000 lekë, e cila është përdorur si burim i pjesshëm për blerjen e një apartamenti banimi me sip. 98.3 m2 në Tiranë me vlerë 12,460,000 ose 89’000 euro. Huaja deklarohet të jetë shlyer plotësisht në vitin 2014 nëpërmjet një kredie të marrë në Bankën Societe General Albania.
Deklarata e pasurisë së vitit 2003
Deklarata e pasurisë së vitit 2004
Deklarata e pasurisë së vitit 2005
Deklarata e pasurisë së vitit 2006
Deklarata e pasurisë së vitit 2007
Deklarata e pasurisë së vitit 2008
Deklarata e pasurisë së vitit 2009
Deklarata e pasurisë së vitit 2010
Deklarata e pasurisë së vitit 2011
Deklarata e pasurisë së vitit 2012
Deklarata e pasurisë së vitit 2013
Deklarata e pasurisë së vitit 2014
Deklarata e pasurisë së vitit 2015
Deklarata e pasurisë së vitit 2016 /BIRN/
