Syri i ministres për kullat e Lali Erit dhe zona gri e pastrimit të parave

Nga BoldNews.al

Për ministren e Financave, Delina Ibrahimaj, kullat që janë ngritur dhe po ngrihen në Tiranë me firmën e Veliajt dhe me urdhrin e Ramës, janë tregues zhvillimi, që nuk duken vetëm me sy, por edhe me shifra.

“Dëgjova për kullat që po ndërtohen në Tiranë që në perceptimin tuaj është pastrim parash, ndërsa në perceptim tim do të thotë zhvillim. Kjo duket jo vetëm me sy, por edhe shifra”, u shpreh ministrja. Si titullare e ministrisë dhe “kujdestare” për të luftuar pastrimin e parave të pista, që në Shqipëri kanë “lavatriçen Rilindje” në fushën e ndërtimit, ka në zyrën e saj një raport të zi për vendin tonë.

Fatkeqësisht Shqipëria është vendosur në zonën gri nga Moneyval, institucioni që merret me shqyrtimin e vendeve ku pastrohen paratë. Jemi vendi i vetëm në Europë që jemi përfshirë në këtë listë, në zonën gri që përbën rrezikun maksimal. Ky organizëm i kërkoi qeverisë shqiptare pak muaj më parë, përmirësime në disa fusha që lidhen me uljen e informalitetit dhe monitorimin e parasë kesh në ekonomi.

Ekspertët, bazuar në disa të dhëna indirekte, ngrenë dyshime se në disa sektorë si ndërtimi apo tregu i pasurive të paluajtshme pastrohen para. Edhe sipas të dhënave zyrtare të Drejtorisë së parandalimit të pastrimit të parave në një përqindje të lartë të rasteve të identifikuara, nuk dihet origjina e parave të pista dhe në 30% të rasteve që dihen ato vijnë nga trafikimi i lëndëve narkotike.

LEXO EDHE  Automjeti del nga rruga, plagoset 19-vjeçari

Një nga format më të përhapura për pastrimin e parave të pista konsiderohen ndërtimet, kryesisht kullat që lulëzojnë në çdo stinë në Tiranë. Qindra milionë euro derdhen për ndërtimin e tyre, ndërsa burimi i parave mbetet gjithnjë i dyshimtë. Kjo parajsë, që u rrit vrullshëm në kohën e Rilindjes së Ramës, i nxiti interesin edhe mafias italiane që të kthenin sytë nga Shqipëria. Në disa dosje hetimore të hapura në Itali, përmendet jo vetëm Tirana si “kryeqyteti i pastrimit të parave”, por edhe individë politik që do përfshiheshin në këto afera.

Emri i Veliajt qarkullon dendur në thuajse çdo dosje që vjen nga përtej detit, por kjo nuk e ka penguar dorën e tij që të punojë rrjedhshëm në hedhjen e firmës për dhënien e lejeve në ngritjen e kullave. Çdo zonë e lakmuar në Tiranë, kryesisht në qendra, është kthyer në shesh ndërtimi për kullat që i kanë zënë frymën por edhe sytë qytetarëve.

Ndërsa për agjencitë prestigjioze që hartojnë raporte për rrezikun e pastrimit të parave të pista Shqipëria është përfshirë në listën gri, për drejtuesit e qeverisë ky është zhvillim. Me këtë mentalitet ligjëroi edhe ministrja e Financave që në sytë e saj dhe “mendjen e hapur” sheh vetëm zhvillim, ndërsa as që e konsideron problem se në Evropë, i vetmi shtet i përfshirë në listën gri të rrezikut të pastrimit të parave të pista është Shqipëria.