Dy ekipet që po dominojnë Superioren deri sot, Kukësi dhe Tirana nuk gabuan në ndeshjet e javës së 11-të.
Kukësi po shkëlqen me lojë dhe me rezultate teksa nuk e diskutoi fitoren madje dominoi në çdo aspekt Kastriotin në ndeshjen e luajtur në Kamzë teksa sfida u mbyll me rezultatin e thellë 6-1.
Verilindorët shënuan dy herë në pjesën e pare me Feijao dhe Milunoviç duke mbyllur diskutimet për suksesin ndërsa fraksioni i dytë i ndeshjes ishte një lojë “fëmijësh” për skuadrën e Longos që shënoi edhe 4 herë të tjera, 2 herë sërish me brazilianin Feijao, një herë me Taipin dhe në fund Lulaj. Me këtë fitore Kukësi konfirmohet si skuadra për titull bashkë me Tiranën me këtë të fundit që u përgjigjen me një fitore të pastër 2-0 ndaj Egnatias në Rrogozhine.
Me një trajner të ri si Përparim Daiu, vendasit nuk mundën t’i bënin ballë Tiranës të cilët e zgjidhën ndeshjen që në pjesën e pare me dy gola të realizuar.
2-0 ishte rezultati final teksa përveç kësaj fitoreje, Tirana fiton edhe bomberin e rigjetur, Michael Ngo’o i cili u rikthye te goli pas shumë kohësh në Superiore teksa shënoi golin e dytë në fund të pjesës së pare. Ndërkohë që Ismajlgeci ishte dhe ai që hapi rrugën e suksesit me golin në 39’.
Pjesa e dytë ishte vetem një menaxhim i lojës nga bardheblutë që nuk u sforcuan për të shënuar më shumë por u mjaftuan me 3 pikët që i mbajnë në krye. Beteja vijon, Tirana 24 pikë dhe Kukësi 23 që nuk lëshon terren.
