Zëvendësambasadori amerikan në Tiranë, Demian Smith është parë këtë të Premte të hyjë në zyrat e selisë qendrore të Partisë Demokratike, ku mendohet se do të ketë një takim me kryetarin e PD-së, Lulzim Basha.
Për takimin nuk ka pasur asnjë reagim zyrtar nga palët. Duket se ambasadorja amerikane Yuri Kim ka zgjedhur të delegojë këtë herë zëvendësin e saj për të biseduar me kreun e PD-së, pas shumë takimeve që ka zhvilluar me Lulzim Bashën më herët. Ishte pikërisht pas një takimi me Bashën, kur ajo paralajmëroi publikisht PD-në të distanciohet nga Berisha ose ndryshe “do të hajë bar”.
Tensionet kanë ardhur duke u shtuar që prej atëherë. Sali Berisha u përjashtua nga grupi parlamentar demokrat. Një vendim i Lulzim Bashës ky që solli kundërpërgjigjen e ish-kryeministrit Sali Berisha, i cili nisi takime me demokratët dhe mbledhjen e formave për thirrjen e një Kuvendi Kombëtar lidhur me vendimin e Bashës. Sot, Berisha thotë se ka 87 përqind mbështetje nga demokratët dhe shrphet se pas Kuvendit të 11 Dhjetorit Lulzim Basha do të shkarkohet nga drejtimi i partisë.
Ky i fundit, nga ana tjetër, ka thirrur një Kuvend Kombëtar më datë 18 Dhjetor dhe thotë se Kuvendin e 11 Dhjetorit nuk e njeh.
Berisha po ashtu e ka akuzuar ambasadoren Kim se po mbështet Bashës dhe ka tentuar të censurojë lëvizjen e tij brenda PD-së.
“Fillova një lëvizje brenda partisë që po ecën mbarë dhe sondazhet e fundit të pavarura tregojnë se mbështetja për kryetarin aktual të partisë ka rënë në 7%, kurse mbështetja për Sali Berishën është 87%. Pavarësisht kësaj, ambasadorja amerikane, për çudi, thirri një grup gazetarësh një ditë dhe u kërkoi që të censuronin lëvizjen time në lajme. Gazetarët nuk ishin të kënaqur me këtë dhe i thanë së n.q.s. dëshironte të mbështeste kryetarin e PD-së Lulzim Basha, atëherë le të shtonte kritikat ndaj qeverisë. Ajo tha se nuk mund të ndërhynte. U mërzita sepse ky është një gjest i shëmtuar, është një shkelje e kushtetutës së SHBA-së. Ajo duket sikur vjen nga mbretëria e censurës, jo nga vendim më i madh i botës”, u shpreh Berisha gjatë një interviste.
