SPAK ka kërkuar 10 vite burg për Astrit Avdylin, i konsideruar si kreu i grupit të struktuar kriminal të pagëzuar me emrin “Avdylajt”.
Sipas kërkesës së SPAK, Astrit Avdyli duhet të vuajë dënimin në burgun e sigurisë së lartë, për grup të struktuar kriminal, armëmbajtje pa leje dhe trafikim droge.
Gjithashtu SPAK ka kërkuar 9 vite burg për Jasim Kala, dhe po kaq vite burg edhe për Denis Llaftiu.
SPAK ka kërkuar 3 vite burg për Fatos Llaftiu, ndërsa për të akuzuarin tjetër Iskender Sale (Alias Mehmet Gjini) është kërkuar dënimi me 12 vite burg. Ndërkohë për të akuzuarin tjetër Xhemal Shala u kërkua 13 vite burg.
Astrit Avdylaj, i cili u lirua nga burgu në korrik të këtij viti për shkak të tejkalimit të afateve të paraburgimit. Ai akuzohet për veprën penale “grup i strukturuar kriminal”, “trafikim i narkotikëve” dhe “Armëmbajtje pa leje”.
Operacioni i koduar “Volvo-4” u zhvillua 3 vjet më parë, ndërsa në atë kohë drejtues të Policisë së Shtetit dhe Prokurorisë së Krimeve të Rënda deklaruan arrestimin e 27 personave.
Operacioni u drejtua në 12 qytete, nga Hasi deri në Sarandë, ndërsa me këtë operacion, policia pretendon se ka goditur 4 grupe të skeduara.
Në atë kohë u deklarua se në laboratorin e sekuestruar në sajë të këtij operacioni, policia sekuestroi 182.5 kg morfinë, e ndarë në 175 pako, 22 litra lëndë e lëngshme, të cilat përdoreshin për prodhimin e heroinës.
