Zgjerohet harta e variantit shqetësues, Omicron rreth globit. Greqia konfirmoi rastin e parë, i cili sipas ministrit të Shëndetësisë është një shtetas që ka udhëtuar nga Afrika e Jugut drejt Kretës. Raportohet se i prekuri ka simptoma të lehta. Më herët edhe shtetet e bashkuara konfirmuan rastin e parë në shtetin e Kalifornisë, e po ashtu Emirate e Bashkuara Arabe dhe Koreja e Jugut, e cila po lufton më shpërthimin më të rëndë të infektimeve, njoftuan se varianti i transmetueshëm kishte mbërritur në territoret e tyre.
Ekspertet në Afrikën e Jugut paralajmëruan se Omicron po nxit një valë shqetësuese infektimesh në dhe po bëhet shpejt varianti dominues.
“Ka pasur rritje eksponenciale të infektimeve përgjatë dy javëve të fundit; nga mesatarisht 300 raste në ditë në 1000 javën e kaluar dhe 3500 tani. Të mërkurën Afrika e Jugut regjistroi 8,561 raste”, deklaroi Dr.Michelle Groome nga Insituti Kombëtar i Sëmundjeve të Transmetueshme.
Ndërsa mbeten pikëpyetje të rëndësishme mbi transmetueshmërinë e variantit Omicron, i identifikuar në të paktën 24 vende rreth botes, ekspertja e OBSH, Maria Van Kerkhove tha në një konferencë se të dhënat duhet të jenë të disponueshme brenda disa ditësh.
Të dhënat e para epidemiologjike sugjerojnë se varianti ishte në gjendje t’ i rezistonte deri në një farë mase mbrojtjes natyrale apo nga vaksinat, por besohet se vaksinat ekzistuese ofrojnë mbrojtje kundër sëmundjes së rëndë dhe vdekjes. Britania e madhe dhe Shtetet e Bashkaura janë mes vendeve që kanë intensifikuar fushatën për dozën përforcuese. Eksperti më i lartë i sëmundjeve infektive në vend, Anthony Fauci tha se të rriturit e vaksinuar plotësisht duhet të marrin dozën e tretë për të siguruar mbrojtjen më të mirë të mundshme.
