12 ditë nga deklarata e Ramës se kosto e pastrimit është më e lartë se ajo që bashkitë u faturojnë qytetarëve, Këshilli Bashkiak i Vlorës ka vendosur rritjen e tarifës vjetore të pastrimit për bizneset që operojnë në territorin e Bashkisë së Vlorës.
Rritja për këto biznese shkon nga 48-70 për qind më shumë nga tarifat që janë në fuqi. Sipas vendimit të Këshillit Bashkiak, është bërë një zonim paraprak i bizneseve që do të preken nga kjo rritje.
Gjithashtu, është marrë në konsideratë edhe deklarimi i bizneseve si dhe regjistrat e tyre të fjetjes për sektorin e hotelerisë.
Bizneset sezonale nuk do preken nga ndryshimet, ndërsa ato që operojnë gjithë vitin do të taksohen sipas zonimit.
Paraprakisht, mendohet se nga kjo rritje preken përafërsisht 576 biznese në Bashkinë e Vlorës. Ndërkohë përfaqësuesit e këtyre bizneseve shprehen se nuk janë konsultuar për këtë rritje, të cilët e konsiderojnë të pajustifikueshme.
Vendimi i Këshillit Bashkiak të Vlorës për rritjen e tarifës e pastrimit për bizneset hyn në fuqi menjëherë pas shprehjes së ligjshmërisë nga ana e prefektit te qarkut.
