Partizani agresiv në merkato, në janar planifikohet rikthimi i bujshëm

Foto: Partizani.al

Janari është pranë dhe një nga klubet që pritet të ndërhyjë më shumë në merkaton e fillimvitit 2022, është Partizani. Të kuqtë nuk kanë qenë në nivelin e pritshëm nga të gjithë në këtë nisje të sezonit dhe do të provojnë të afrojnë lojtarë, që mund të shtojnë cilësinë e organikës së Ilir Dajës.

Në ditët e fundit po flitet jo pak për një rikthim të bujshëm. Burime pranë klubit të Partizanit bëjnë me dije për “Panorama Sport” se Eneo Bitri është një opsion konkret për merkaton e janarit. Mbrojtësi la të kuqtë pas thuajse dy vitesh dhe u transferua me parametra zero në Kazakistan, ku firmosi me Astanën deri në dhjetor të vitit 2022. Gjithsesi, qëndrimi i tij atje nuk pritet të zgjasë sa është parashikuar në kontratë.

25-vjeçari e nisi shumë mirë aventurën me ekipin e ri, duke shënuar në Kupë dhe Europa Ligë, para se të merrte pushimet e të kthehej në vendin tonë. Këtu ai u infektua me COVID-19 dhe nuk shkoi në formë optimale në klubin e tij. Ndeshjet e fundit në kampionat ai i nisi nga stoli dhe të aktivizuarit në vend të tij bënë mirë, duke ia marrë vendin e titullarit. Tashmë që në Kazakistan sezoni ka mbaruar, nuk përjashtohet ndarja me Astanën.

LEXO EDHE  LIVE/ Hertha-Bayern Munich, ndiqni sfidën

Bitri kërkon aktivizim të vazhdueshëm dhe duket se e ka të vështirë ta gjejë atje. Pistat për të janë disa, përfshirë edhe ish-klubin e tij. Mbrojtësi me shumë mundësi kërkon një tjetër klub në liga më të forta dhe të pasura se Superiorja, por Partizani ekziston si opsion. Madje, siç bëhet me dije, ka pasur kontakte mes përfaqësuesve të lojtarit dhe presidencës së Partizanit për një rikthim të mundshëm të mbrojtësit. Fakti që Bitri ka qenë një nga shtyllat e ekipit dhe e njeh shumë mirë sistemin e lojës së Ilir Dajës, e bën këtë pistë një mundësi reale për t’u materializuar në janar. Ai mund të vijë në formën e huazimit, por edhe me parametra zero, nëse arrin konsensusin e largimit me Astanën./Panoramasport