Vetingu/ “Zhdukja” e Porch-it luksoz me targa amerikane rrezikon gjyqtarin Besnik Hoxha

Nga Boldnews.al

Në janar të vitit 2013, gjyqtari Besnik Hoxhaj doli nga gjykata e Tiranës, pas një vendimi me interes të lartë për publikun, në prani të shumë mediave.

Ai, siç u raportua në atë kohë, nxori çelësin e automjetit nga xhepi, hapi derën e një “Porche Cayene”, një fuoristradë shumë e shtrenjtë, edhe për biznesmenët e mëdhenj, dhe u largua qetësisht në trafikun e rrëmujshëm të Tiranës.

Kjo makinë luksoze, me targa amerikane të shtetit të Masachusettsit, është parë shumë herë në oborrin e gjykatës së Tiranës dhe kolegë e stafi administrativ i gjyqtarit Besnik Hoxhaj tregohen të bindur se ishte automjeti i tij.

Në foto: Automjeti “Porsche Cayene”, në të cilin është fotografuar nga mediat gjyqtari i Tiranës, Besnik Hoxhaj

Por, në formularët e pasurisë së Besnik Hoxhajt nuk gjendet pronësia mbi një automjet të tillë.

Të jetë pasuri e fshehur? Aq më tepër, me targa amerikane, shtetit që ka vënë në shënjestër gjyqtarët dhe prokurorët e korruptuar në Shqipëri?

Këtë mbetet ta zbardhë Komisioni i Pavarur i Kualifikimit (KPK), i cili prej rreth 1 viti e gjysëm e ka përfshirë në procesin e rivlerësimit.

Boldnews.al” ka verifikuar me hollësi deklaratat e pasurisë, të dorëzuara nga gjyqtari Besnik Hoxhaj pranë Inspektoratit të Lartë të Deklarimit të Pasurive dhe Konfliktit të Interesave.

Prej vitit 1996 e deri në vitin 2018, kur blen në Renault me kredi (leasing), gjyqtari Besnik Hoxhaj nuk rezulton zyrtarisht të ketë pasur automjet në pronësi. As atë ‘Porche Cayene-n”, në timonin e të cilës e kanë parë shumë njerëz.

Bazuar në formularët e pasurisë, Besnik Hoxhaj duket se ka pasur një jetë financiare normale. Ai është mbështetur kryesisht tek paga e tij dhe e bashkëshortes.

Megjithatë, kjo nuk e ka penguar që të jetë pronar i një ndërtese 3-katëshe në Shkodër.

Në formularin fillestar të pasurisë, të dorëzuar në vitin 2003, gjyqtari Besnik Hoxhaj deklaron se ka në ndërtim një godinë dy-katëshe, me sipërfaqe të çdo kati 80 metra katrorë, në Shkodër.

LEXO EDHE  Fallxhorja Kushi/ Pezullimi i mësimit, qeveria tenton të mbulojë dështimet me arsimin dhe me pandeminë

Kjo godinë, në formularin e legalizimit të vitit 2015 shndërrohet në një ndërtesë 3-katëshe, me sipërfaqe totale 300 metra katrorë.

Në foto: Formulari i pasurisë së gjyqtarit Besnik Hoxha për vitin 2017

Për këtë investim, gjyqtari deklaron se ka shpenzuar gjithsej 5 milionë lekë të reja, me burim nga të ardhurat familjare ndër vite.

Kjo është e vetmja pasuri e patundshme e deklaruar nga gjyqtari, i cili prej vitit 2011 ushtron detyrën në Tiranë.

Në formularët e pasurisë, në pjesën publike, nuk shënohet askund se në cilin apartament mblidhet në mbrëmje familja e gjyqtarit.

Në Shkodër, është e sigurt që nuk shkojnë çdo ditë. Kjo duket qartë nga fakti se, si gjyqtari, ashtu edhe bashkëshortja e tij, janë të punësuar në kryeqytet.

Në formularët e pasurisë nuk shënohet as ndonjë pagesë qiraje për apartament në Tiranë, megjithëse deklaratat e interesave private caktojnë detyrimin që subjektet duhet të shënojnë edhe shpenzimet, krahas të ardhurave dhe pasurive të tjera.

Nga ana tjetër, gjyqtari Besnik Hoxhaj rezulton edhe “i mbytur” në borxhë. Në vitin 2017 ai deklaron se ka marrë një hua në shumën 53 mijë paund britanik, për studimet e djalit të tij në Angli.

Për këtë hua, ai deklaron se e ka marrë pa interes dhe pa afat dhe se do ta shlyejë pasi të shesë ndërtesën 300 metra katrorë në Shkodër.

Të paktën deri në formularin e dorëzuar në mars 2021 për pasuritë deri në vitin 2020, gjyqtari Hoxhaj vijonte ta kishte këtë detyrim të pashlyer.

Procesi i rivlerësimit kalimtar të gjyqtarëve dhe prokurorëve kanë ngritur shpesh pikëpyetje mbi borxhet pa interes dhe pa afat që kanë marrë gjyqtarët e prokurorët, ndër familjarë apo persona të rrethit miqësor.

Një pjesë e madhe e këtyre zyrtarëve tashmë janë larguar nga detyra, pasi trupa e Vetingut nuk kanë arritur të binden mbi vërtetësinë e burimit të këtyre “huave pa afat dhe pa interes”.