Interi mori tre pikë në ndeshjen e djeshme në transfertë kundër Venezias. Calhanoglu zhbllokoi sfidën, ndërsa në shtesë Lautaro Martinez realizoi golin e dytë me penallti.
Trajneri Simone Inzaghi vlerëson paraqitjen e skuadrës së tij, por thekson se duhet t’i mbyllin ndeshjet më parë.
“Po kalojmë një formë të mirë. Kemi luajtur ndeshjen e tretë në 6 ditë, por treguam karakter të madh dhe bëmë një lojë të mirë. E vetmja gjë negative është se duhet ta kishim shënuar golin e dytë më herët, pasi Venezia është një nga surprizat e sezonit dhe nuk është mirë ta lëmë ndeshjen hapur deri në fund. Ne jemi Interi dhe duhet ta kishim vrarë ndeshjen më herët, por në këto rrethana jemi të lumtur”, tha ai.
Në vijim ai tha se largimi i Lukakut dhe Hakimit, nuk po ndihet, ndërsa kemi afruar lojtarë të përshtatshëm për projektin tonë.
“U kualifikuam në Champions League, që ishte objektivi i parë dhe shkojmë në Madrid për të luajtur me Realin dhe për të tentuar vendin e parë në grup.
Nuk ka qenë nevoja t’u them lojtarëve se duhet ta dëshmojnë se fitojnë edhe pa Lukakun dhe Hakimin. Po stërvis disa lojtarë të mëdhenj, që mbi të gjitha janë djem të mëdhenj.
Eriksen është një tjetër lojtar që ishte fantastik në pjesën e dytë të sezonit të shkuar dhe ne jemi pa të tani. Është një proces rritjeje, kemi sjellë lojtarë që na bëjnë punë për idenë tonë të futbollit dhe shohim përpara”, u shpreh Inzaghi.
