Kryeministri Edi Rama ka shmangur komentet e Gabriel Escobar për “Ballkanin e Hapur”, gjatë një konference për mediat këtë të Premte.
Zv/ndihmës sekretari amerikan i shtetit, Gabriel Escobar, tha të Mërkurën se nisma “Ballkani i Hapur”, nuk mund të ketë sukses, nëse pjesë e saj nuk janë të gjashtë vendet e Ballkanit Perëndimor.
Këtë të Premte, pas mbledhjes së përbashkët në Elbasan mes qeverive të Shqipërisë dhe Kosovës, kryeministrat Edi Rama dhe Albin Kurti dolën një konferencë për mediat, ku folën për marrëveshjet që u nënshkruan mes dy vendeve e më pas iu përgjigjën pyetjeve të gazetarëve.
Rama u pyet për komentet e Gabriel Escobar lidhur me “Ballkanin e Hapur”, nismë e cila kundërshtohet nga Albin Kurti. Në përgjigjen e tij, kreu i qeverisë shqiptare nuk komentoi në asnjë moment, deklaratat e Escobar.
Pyetjes “a kanë një mendim unik dy kryeministrat shqiptarë për problemin e Kosovës dhe Serbisë dhe cili është qëndrimi i Shqipërisë për Ballkanin e Hapur. Dimë qëndrimin e Kosovës, i cili është kategorikisht kundër Ballkanit të Hapur dhe së fundmi kemi parë mesazhin e SHBA-ve që thonë se pa përfshirjen e 6 shteteve s’mund të ketë Ballkan të hapur”, Rama iu përgjigj:
“Mendimi i Shqipërisë, mendimi i kësaj qeverie, mendimi im lidhur me Kosovën e Serbinë nuk është as sekret, as i panjohur. Është i njëjti mendim që unë e kam shprehur qysh në krye të herës dhe në mes të Beogradit. Kështu që nuk ka ndryshuar. Në këtë pikë s’ka asnjë dilemë. Për sa i përket Ballkanit të Hapur kemi sigurisht dy qasje, qëndrime, opinione të ndryshme, por nga ana tjetër duhet edhe ju, edhe të gjithë të mësohen me faktin që mund të mos mendojmë njësoj për të gjitha gjërat. Por, kjo nuk na pengon të vendosim të gjitha forcat për të bërë së bashku gjërat e dhurua në funksion të së ardhmes së dy vendeve tona. Kështu që mendoj se mendoj se këto opinione të ndryshme për Ballkanin e Hapur nuk përbëjnë asnjë pengesë për të fuqizuar marrëdhëniet mes nesh. Dhe nëse do më lejoni ti referohet shqiponjës me dy koka, është një trup i vetëm, ku njëra sheh nga njëra anë dhe koka tjetër sheh nga ana tjetër, por trupi qëndron drejt. Që do të thotë, Shqiponja është krejtësisht e informuar vizualisht në 360 gradë. Prandaj, mos kini asnjë dyshim se shqiponja me dy koka rrezikohet të kapet në befasi nga njëra anë apo nga ana tjetër pas kontrollon me sy të dyja anët. Asnjë shqetësim për këtë dhe mendoj se është një vlerë e shtuar në këtë rast, në këtë periudhë të historisë sonë që jemi një shqiponjë me dy koka. Kur të vijë dita që të jemi shqiponjë me një kokë, rreziku është që të kafshojmë veten më shumë sesa sot që nuk e kemi këtë luks dhe nuk e kemi as këtë qëllim. Kështu që unë personalisht jam optimist për zhvillimin e marrëdhënieve tona. Jam optimist për këndvështrimin strategjik, por dhe për angazhimin që kemi vendosur bashkarisht në funksion të këtij këndvështrimi për marrëdhëniet tona. Për Ballkanin e Hapur është një debat i hapur mes meje dhe Albinit dhe mos prisni kurrë që mes meje dhe Albinit të gjitha debatet të jenë të mbyllura. Se pastaj i bie që ne të ndryshojmë emrat dhe të mos jemi ata që jemi. Është fiziologjia e një marrëdhënie mes njerëzish që nuk rrinë dot pa menduar dhe e kanë problem po të mendojnë njësoj për të gjitha gjërat”.
