Qyteti i Vlorës u trondit nga një gjest ekstrem i një gruaje, që në rrethana ende të paqarta, është hedhur nga një pallat, së bashku me foshnjen e saj 1 vjeç. Të dy kanë humbur jetën.
Ngjarja ka ndodhur në lagjen “Pavarësia 2”, ndërkohe që ende nuk dihen shkaqet që kanë çuar 34-vjeçaren, vajza e një ish-mjeku të njohur në qytet, në këtë vendim.
Sipas dëshmitarëve, gruaja dhe fëmija janë hedhur nga kati i pestë i pallatit, ndërkohë që sipas tyre, ajo nuk banonte në pallatin nga ku është hedhur.
E ëma dhe e bija u transportuan në spital në gjendje të rëndë shëndetësore, por nuk mundën të mbijetojnë.
Raportohet se 34-vjeçarja bashkë me fëmijën jetonin në Tiranë, ndërsa ajo u hodh nga një pallat në Vlorë, jo shumë larg vendit ku jetonin prindërit e saj.
Një nga banoret e pallatit ku ndodhi ngjarja, tha se e njeh të atin e viktimës. Ajo shtoi se kishte dëgjuar që vajza ishte e divorcuar, me profesion ishte farmaciste dhe punonte në kryeqytet.
Një tjetër fqinjë tha se vajza kishte probleme të shëndetit mendor.
“Sot më datë 26.11.2021, rreth orës 12:30, në lagjen ‘Pavarësia 2’, shtetasja P. M., 34 vjeçe, dyshohet se është hedhur së bashku me fëmijën e saj të mitur K.N., 1 vjeç, nga sheshpushimi i katit të një pallati dhe për pasojë kanë ndërruar jetë. Në vendngjarje ndodhet grupi hetimor dhe po punon për zbardhjen e plotë të rrethanave të ngjarjes”, njoftoi policia.
