Dosja e Saimir Tahirit në Apelin e Gjykatës së Posaçme do të gjykohet nga Daniela Shirka që është kryesuese, anëtare Ilirjana Olldashi dhe një anëtar i tretë ë pritet të delegohet nga Këshilli i Lartë Gjyqësor.
Çështja në ngarkim të të pandehurve Saimir Tahiri dhe Jaeld Çela, e regjistruar pranë Gjykatës së Posaçme të Apelit për Korrupsionin dhe Krimin e Organizuar më date 24.11.2021 u hodh në short ditën e sotme.
Fillimisht ishte përcaktuar që çështjen ta kryesonte gjyqtarja Miliana Muça dhe anëtare gjyqtaret Daniela Shirka dhe Ilirjana Olldashi.
Por, gjyqtarja Miliana Muça paraqiti aktin e heqjes dorë nga çështje (për faktin se është shprehur më parë duke qenë gjyqtare e seancës paraprake). Kjo u miratua nga zëvendëskryetari i gjykatës.
Nga shorti i ri u përcaktua trupa gjykuese e përbërë nga kryesuese Daniela Shirka, anëtare Ilirjana Olldashi. Anëtari i tretë pritet të delegohet nga Këshilli i Lartë Gjyqësor.
Me një vendim dhënë disa javë më parë, Gjykata e Lartë pranoi kërkesën e Tahirit dhe riktheu çështjen në Apel.
Kujtojmë se ish-ministri Saimir Tahiri u dënua me 5 vite burg nga ish-Gjykata e Krimeve të Rënda, për shpërdorim detyre, vendim i cili u konvertua në 3 vite shërbim prove.
