Merrte para për lindjet, procedohet gjinekologia në Berat

Procedohet penalisht një mjeke gjinekologe e Spitalit Rajonal Berat për veprën penale “Shpërdorimi i detyrës”, dhe “Korrupsioni pasiv i personave që ushtrojnë funksione publike”.

Procedohet penalisht edhe një qytetare për “Korrupsioni aktiv i personave që ushtrojnë funksione publike”.

“Specialistët e Seksionit për Hetimin e Krimit Ekonomik e Financiar në DVP Berat, pas nje hetimi 5 mujor, nën drejtimin e Prokurorisë Pranë Gjykatës së Shkallës së Parë Berat, bënë të mundur dokumentimin me prova ligjore të përfitimit në mënyrë të parregullt në disa raste të vlerave monetare nga mjekja gjinekologe E.Sh., pranë Spitalit Rajonal Berat. Nga hetimit rezultoi se kjo mjeke gjatë kryerjes së vizitave dhe operacioneve të lindjes, merrte vlera monetare nga familjarët e shtetaseve që i nënshtroheshin operacionit për të kryer lindjen. Gjithashtu u procedua penalisht edhe shtetasja M.G, e cila i ofroi një shumë parash mjekes për të kryer operacionin për kunatën me qëllim lindjen e fëmijës”, njoftoi policia.

LEXO EDHE  Shpëtoi fqinjin nga flakët, emigranti hero shqiptar ndërron jetë në Suedi

Nën drejtimin e Prokurorisë vijon puna për dokumentimin e plotë ligjor, ndërsa materialet i kaluan Prokurorisë së Rrethit Gjyqësor Berat për veprime të mëtejshme për veprat penale  “Shpërdorimi i detyrës”, “Korrupsioni pasiv i personave që ushtrojnë funksione publike”, dhe  “Korrupsioni aktiv i personave që ushtrojnë funksione publike”, shtuan të njëjtat burime.