Deputeti demokrat Agron Shehaj ka verifikuar sot firmat e delegatëve, që mbështesin mbledhjen e Kuvendit Kombëtar të PD më 11 dhjetor, të cilat janë depozituar në zyrën e Kryetarit të Këshillit Kombëtar, Edi Paloka.
Shehaj ka verifikuar më konkretisht firmat e delegatëve të njësisë nr 5 dhe nr 7 në Tiranë, atje ku edhe është drejtues politik.
Deputeti demokrat ka telefonuar delegatët, të cilët i kanë pohuar se kanë plotësuar formularin dhe firmat e tyre janë autentike.
“Jam këtu për të verifikuar nëse firmat ekzistojnë”, tha Shehaj.
Mbledhjen e Kuvendit Kombëtar të PD e mbështesin rreth 5 mijë delegatë nga 7045 që ndodhen në listat e fundit, ndërkohë që në zyrën e Palokës janë depozituar 4200 formularë. Në anën tjetër, kreu demokrat Lulzim Basha ka kërkuar mbledhjen e Kuvendit me 18 dhjetor, duke e cilësuar atë tëdatës 11 dhjetor një miting dhe jo Kuvend.
Basha, nënkryetarët e PD dhe Sekretari i Përgjithshëm i kësaj partie, nuk njohin si procedurë të rregullt depozitimin e firmave në zyrën e Kreut të Këshillit Kombëtar, Edi Paloka, ndërsa kanë kërkuar që ato të depozitohen në protokollin e partisë.
Asnjë prej drejtuesve aktualë të PD nuk ka pranuar të verifikojë listat e delegatëve në zyrën e Palokës, ndërkohë që ish- Kryeministri Sali Berisha ka kërkuar së fundmi dorëheqjen e Sekretarit të Përgjithshëm dhe nënkryetarëve, me pretendimin se ato nuk janë zgjedhur me votë të fshehtë, por janë emëruar nga Lulzim Basha.
