Kryetari i PD, Lulzim Basha është pyetur lidhur me mundësinë e një ribashkimi me paraardhësin e tij politik ish-kryetarin e demokratëve, Sali Berisha.
Basha është përgjigjur se kjo mundësi ribashkimi ishte hedhur në erë dhe se Berisha nuk kishte asnjë lloj mundësie afrimi me demokratët.
Në intervistën për Tv Klan, Basha tha se ish kryeministri nuk e kishte mbajtur fjalën që t’i kthente takimet në tur lamtumire, duke i kthyer në një tur ofendimesh ndaj të gjithë atyre personave që mendojnë ndryshe nga ai.
“Për fat të keq Sali Berisha ka hedhur në erë çdo urë të mundshme të afrimit me demokratët. Sallat pa diskutim kanë pasur në fillesat e tyre njerëz të etur për të dëgjuar, por këtë etje për të dëgjuar askush nuk e ka abuzuar më shumë sesa Sali Berisha. Mund ta kishte kthyer këtë me të vërtet në një turrë dëgjesash dhe lamtumire siç premtoi, duke marrë vendimin që premtoi, mos përfshirjen e Partisë Demokratike dhe të demokratëve në betejën që ai ka nisur me Shtetet e Bashkuara të Amerikës pas shpalljes non grata. Në fakt e ktheu në një tur linçimi të çdokujt që mendon ndryshe nga Sali Berisha, të çdokujt që mbron interesat e demokratëve përballë interesave personale të Sali Berishës. Dhe këtu për fat të keq është ai që ka përcaktuar rrugën dhe fundin e kësaj rruge”, tha Basha.
