Një shqiptar u kontrabandua në Britaninë e Madhe nga një grup i krimit të organizuar për të punuar në një nga plantacionet më të mëdha të kanabisit në Uells
Mediat e huaja shkruajnë se është arrestuar shtetasi shqiptar, Aldjon Musollari, i cili kishte shndërruar një ish-zyre postare në një biznes të sofistikuar 100,000 £ për rritje droge.
Mësohet se muret e shtëpisë ishin të veshura me pllaka gipsi dhe të mbuluara me fletë plastike dhe kishte dhjetëra llamba për rritje, transformatorë të energjisë elektrike, thasë me plehra dhe një sistem ushqimi dhe ujitjeje hidroponik të lidhur në banjën e katit të sipërm. Ata që ngritën fermën kishin hapur gjithashtu një vrimë në tavan dhe kishin vendosur një shkallë që lejonte aksesin e lehtë nga dhomat e tjera të shtëpisë.
Në momentin që ai u ndalua nga policia mësohet se ka thënë: “Unë nuk flas anglisht. Shqip. Pa pasaportë. Ilegal në Britani.”
Musollari ka treguar se në Britaninë e Madhe kishte mbërritur me kamion nga Belgjika rreth 6 javë më parë. Musollari ka treguar se kishte punuar në ndërtim në Liverpool përpara se të dilte me të afërmit në qytet dhe më pas të udhëtonte për në Cardiff ku kaloi një javë duke jetuar në rrugë përpara se t’i afroheshin dy burra të cilët e çuan në Ammanford dhe e mbajtën në banesën e drogës.
Burimi: Walesonline
