Disa dhjetra anëtarë dhe simpatizantë të Partisë Demokratike, me thirrjet “Berisha, Berisha” dhe “Rama ik, Rama ik”, kanë pritur ish-Kryeministrin Sali Berisha në Foltoren e Librazhdit, atje ku sot zhvillon takimin e rradhës me strukturat e kësaj partie.
I pranishëm në këtë takim ishte edhe ish-Presidenti Bujar Nishani, i cili ka mbështetur nga dita e parë “Foltoren” e ish-Kryeministrit Berisha.
Duke iu drejtuar të pranishmëve, që i ka falenduar për pritjen dhe mbështetjen ndaj Foltores, që e ka konsideruar një proces unik jo vetëm për PD, por për gjithë tranzicionin shqiptar, Berisha tha se përulet me nderimin më të thellv dhe mirënjohjen më të pakufishme ndaj dhjetra mijërave demokratëve dhe demokrateve shqiptarë, që e shndërruan këtë vjeshtë në vjeshtën e mrekullisë së dytë më të madhe shqiptare që nga 1990.
“Po rivendosim pluralizmin, po rikthejmë shpresën te liria për vendin dhe kombin tonë. Erdhën në këtë vjeshtë si njerëz thellësisht të lënduar, si shoqëri që nuk votuam sot si të qytetarëruar, pasi narko-shteti i bleu dhe rrëmbeu me fallangat e patronazhistëve, me bandat e pamëshira, votat dhe mandatet”, tha Berisha.
Ai shtoi se erdhëm si shoqëri e prerë në besë, e tradhëtuar dhe e braktisur nga opozita. Ndërsa akuzoi Ramën për blerjen e votave duke përdorur milionat e buxhetit të shtetit, Berisha tha se opozita tradhëtoi besimin e shqiptarëve.
Peng-Kryetari, i cili u zotua se do të mbrojë votën tuaj, i cili u zotua se nuk do të njohë zgjedhjet e 25 prillit, shkelmoi çdo zotim, u morr vetëm me karrigen e tij, dhe filloi bashkëpunimin e turpit me Edi Ramën, PD e shndërri në një ministri të narko-shtetit”, tha Berisha.
