Ngacmimi seksual i 17-vjeçares/ 34-vjeçari i arrestuar: Ishte dashuri me shikim të parë

Një 34-vjeçar u arrestua nga Policia e Gjirokastrës pasi dyshohet se ka ngacmuar seksualisht një 17-vjeçare.

“Specialistët e Seksionit të Hetimit të Krimeve në Komisariatin e Policisë Gjirokastër bënë ndalimin e  shtetasit E G., 34 vjeç, banues në Tepelenë, pasi dyshohet se ka ngacmuar seksualisht një shtetase të mitur, 17 vjeçe”, bënë me dije këtë të Premte burime zyrtare.

Sipas dëshmive në polici, të dy janë njohur në spitalin e Gjirokastrës një ditë më parë, ku 17-vjeçarja ka shtruar një familjarin e saj.

Pasi janë njohur, 34-vjeçari e ka ftuar për kafe 17-vjeçaren dhe të dy kanë udhëtuar me automjetin e tij drejt Viroit.

LEXO EDHE  FOTO/ Aksident i rëndë në Itali, humb jetën 20-vjeçari shqiptar. Plagosen 4 të tjerë

Sipas dëshmisë së 17-vjeçares, 34-vjeçari ka bërë veprime të natyrës seksuale pa pëlqimin e të resë. 17-vjeçarja është vonuar për disa orë dhe pasi i ka treguar prindërve se çfarë i kishte ndodhur, këta të fundit janë alarmuar dhe i janë drejtuar policisë ku kanë bërë një denoncim.

Policia e Gjirokastrës ka arrestuar 34-vjeçarin i cili nga ana e tij ka mohuar akuzat dhe ka deklaruar se ka qenë dashuri me shikim të parë.