Partia Demokratike dhe LSI, dy parti qëpak para zgjedhjeve të 25 prillit nënshkruan edhe një memorandum bashkëpunimi, duket se janë përfshirë në një luftë të hapur me akuza dhe kundër-akuza. Gjithçka nisi me një deklaratë të Sekretarit të Përgjithshëm të PD-së, Gazment Bardhi, sipas të cilit në zgjedhjet e 25 prillit, LSI-së i ishin ofruar 15 deputetë të sigurt në një listë të përbashkët, por ajo refuzoi sepse parashikonte të fitonte e vetme 34 të tillë”.
Pas deklaratës së Bardhit, reagoi LSI që i konsideroi si mashtrime deklarata të tilla. Por lufta vijoi mes dy partive me deklarata respektive, ndërsa kreu demokrat Lulzim Basha, ka hedhur akuza të forta në drejtim të Presidntit Ilir Meta. Në një intervistë për Zërin e Amerikës, Basha u shpreh se ishte Meta që shkatërroi fushatën e LSI-së me qëndrimet e tij në 2 javët e fundit të saj.
“Ka qenë Ilir Meta pjesë, personi Ilir Meta, i cili nëse më pyesni, dy javët e fundit të fushatës ka qenë aseti më i madh i Edi Ramës, shkatërruesi i fushatës në bindjen time, të LSI-së në veçanti në disa zona elektorale nga Vlora në Elbasan dhe në veçanti në javët e fundit me qëndrimet e tij, ka çuar ujë tek mulliri i Edi Ramës”, tha Basha.
Ndërkohë në një tjetër intervistë, atë për Report Tv, kreu demokrat kur u pyet lidhur me LSI, foli me përçmim, teksa tha “mos ia ulim vlerën bisedës”.
Në anën tjetër, Bashës i është përgjigjur Presidenti Ilir Meta, i cili i ka kujtuar të gjitha aksionet dhe veprimet që penalizuan opozitën, duke nisur nga bojkoti i reformës territoriale, më pas me djegien e mandateve, bojkotin e zgjedhjeve lokale etj. Ndërsa, Monika Kryemadhi, kryetare e LSI, nuk ka preferuar të përfshihet drejtëpërsëdrejti në debat me kreun e PD, në lojë janë futur figura të tjera të kësaj partie.
“Kryegënjeshtari ka gënjyer në mënyrë të pacipë për 4 vjet rresht, që nga 17 maji i 2017 ku u ul në tavolinë falë LSI dhe ku menjëherë më pas u shndërrua në zorrën qorre dhe vegël të Edi Ramës dhe ku e sulmoi LSI-në në zgjedhjet e 2017 me çdo mjet e bile më shumë se Rama vetë”, ishte një reagim i gjatë në rrjetet sociale i nënkryetarit të LSI, Petrit Vasili, i cili me një gjuhë të ashpër dhe fyese i drejtohet Lulzim Bashës.
Vasili thotë se Basha e preu në besë LSI-në, duke akuzuar se u gënjyen nga kreu i PD për djegien e mandateve se “kishte një “plan gjerman”, braktisjen e zgjedhjeve lokale, bllokimin e bashkive apo mungesën e kërkesës për pjesëmarrje në zgjedhje lokale në tetor 2019.
Pas Vasilit reagoi edhe Sekretari i Përgjithshëm i LSI, Endrit Braimllari. Ky i fundit shprehet se Basha është një humbës të madh dhe sipas tij tashmë duhet të thuhen të gjitha të vërtetat dhe se ka ardhur koha të mësohen nga të gjithë.
“Koha e Kunat opozitës është djegur përgjithmonë! Të gjithë sot e kanë të qartë të vërtetën. Se Opozita e Bashkuar u tradhëtua nga kryetari i saj, ndaj nuk u arrit fitorja e ndryshimit në 25 Prill. Fitorja e 25 Prillit iu shit Edi Ramës në tavolinë nga Lulzim Basha, i cili është edhe autori i vetëm i fushatës zgjedhore përçarëse mes kampit opozitar, siç e kanë pohuar gjatë dhe pas fushate kandidatët e PD”, thekson Braimllari.
