Nga Boldnews.al
Pak javë më parë, Boldnews.al denoncoi se kryetarja e emëruar (jo zgjedhur) e Bashkisë së Durrësit, Emiriana Sako, shpalli një tender të majmë për vijimin e projektit të Velierës, i cili ka ngjallur shumë dyshime për shkak të kostove të larta dhe shkatërrimit të historisë së qytetit të lashtë.
I vendosur në “Durrësin e vjetër”, Veliera është ndërtuar pjesërisht, ndërkohë që para pak javësh Sako kishte akorduar plot 2.5 milionë euro për vijimin e projektit.
Boldnews.al faktoi se, pas vendimmarrjes së Sakos dyshohej se fshihej pikërisht Dako, që kontrollon “de facto” qytetin bregdetar, megjithëse është larguar prej kohësh nga drejtimi i bashkisë. Por, e “preferuara” e tij, Emiriana Sako, ka arritur që të ndjekë “gjurmët” e tij, teksa një pjesë të rëndësishme të vendimmarrjes, Sako ia ka kushtuar tenderëve. Që nga plehrat, te rindërtimi apo projektet e brendshme e kanë kthyer Durrësin në nje lavatriçe parash, ndërsa lejet e ndërtimit janë shtuar së fundmi.
Gjatë këtyre javëve, investigimin e Boldnews.al e konfirmoi edhe nënkryetari Arbër Braho, që denoncoi bërjen e tenderëve nga Bashkia e Durrësit dhe se pas tyre ishte pikërisht Dako. Madje, ai tha se “në bashki futen çanta me para”, ndërsa fill pas akuzave të rënda ai u shkarkua.
Disa ditë pas shkarkimit të Arbër Brahos, Bashkia e Durrësit ka anuluar tenderin për shtesën e investimit te Veliera. Frikë nga ndonjë hetim i SPAK apo po përdor skemën e rritjes së vlerës së këtij projekti? Këto janë dy dyshimet pas kësaj vendimmarrje.
Pas akuzave publike tepër të rënda nga Braho, SPAK mund të nisë hetimet kryesisht. Ashtu si u parashikua edhe pas denoncimit të Petro Koçit me tenderat në Fier. Por, në atë kohë, Armando Subashi u tërhoq nga disa tendera, pas frikës të ndonjë hetimi të mundshëm. E njëjta gjë mund të ndodhë me Emiriana Sakon. Boldnews.al parashikoi se tenderi i Velierës do të shkonte për disa biznesmenë afër Dakos. Dhe, akuzat e Brahos sollën më pas tërheqjen e kryetares.
Ndërkohë, skema e dytë lidhet me një tërheqje të saj për të rritur vlerën. Një skemë e ngjashme me vendimmarrjen që plehrat e Durrësit të shkonin në koncesionarin e Sharrës. Fillimisht akordoi rreth 2.5 milionë euro për plehrat dhe pas dështimit të procedurës së parë, e rriti vlerën në plot 10 milionë euro.
Megjithatë, fakt është se Sako ka publikuar një njoftim në Agjencinë e Prokurimit Publik ku njofton se tenderi me objekt “faza e katërt e sheshit publik para hyrjes së Porti Durrës (VELIERA)”, me fond limit 248.179.962 lekë u anulua.
Arsyeja është se u “konstatua se dokumentet e tenderit përmbajnë gabime ose mangësi të rëndësishme”.
