Avokati Ermal Hamataj ka zbuluar detaje tronditëse nga krimi makabër në Fier, ku një 8-vjeçar u rrëmbye paraditen e djeshme dhe u gjet në mbrëmje i vrarë dhe i groposur nga fqinji i tij.
Hamataj tha në emisionin “Me zemër të hapur” në News24 se fëmija kishte dalë nga shtëpia pak para orës 10:00 për të blerë bukë dhe në orën 10:00 ka qenë i vdekur.
“Autori nuk është i paaftë mendërisht, duhet të dënohet si person i përgjegjshëm para ligjit. Ai nuk është i paaftë mendërisht. Përmes vendimit të gjykatës në 2006 vihet re qartë që është i aftë mendërisht. Duhet të dënohet siç thotë neni 79 i Kodit Penal, me burgim të përjetshëm. Çdo situatë që e nxjerr të paaftë mendërisht e shpëton nga burgimi i përjetshëm.
Kallëzimi nga prindërit është bërë në orën 15:30. Djali ka dalë nga shtëpia pak para orës 10 dhe ka qenë i vdekur në orën 10. Brenda 30 minutash ka mbaruar gjithçka. Autori e ka qëlluar me kazmë pas koke, e ka lidhur fëmijën dhe fëmija është gjetur i groposur me duar të lidhura mbrapa. Kjo tregon dashakeqësinë dhe kulmin e shtazërisë së një personi ndaj një fëmije të mitur. I ka dhënë biçikletën fëmijës kur kishte shkuar të blinte bukë”, tha avokati.
Ai tregoi më tej se familja e autorit dhe e viktimës kanë pasur një konflikt të mëhershëm i cili është harruar në paqe.
“Njiheshin që në 2005 familjet. Në orën 10:00 e kishte groposur fëmijën dhe në orën 14:00 dilte tek dera dhe pyeste të ëmën dhe të atin ‘a e gjetët Mateon’. Djali është gjetur me duart e lidhura pas, i baltosur që ne kemi dhe zakonet, nuk baltoset trupi. Ishte groposur pranë banjës, që mbajnë në fshat.
Në polici autori ka qenë i qetë, më të qetë se sa jemi ne tani dhe hera-herës duke qeshur. Ka qenë nën efektin e lëndëve narkotike, kanabis sativa, por njihej si përdorues alkooli. Por në momentin e krimit nuk ka qenë nën efektin as të drogës e as të alkoolit. Ky shtazë nuk duhet mbahet në burg, por ligji është ky. Le të ushqehet me taksat tona, por të mos e shohë më dritën e diellit”, tha avokati Hamataj.
