Kapen duke luajtur Poker/ Sekuestrohen rreth 23.000 Euro, 3 të arrestuar në Tiranë

Foto - Policia e Tiranës

Tre persona janë arrestuar dhe rreth 23.000 Euro janë sekuestruar nga policia e Tiranës, që ka zbuluar një grup personash duke luajtur “Poker” në një ambient në rrugën “Konferenca e Pezës”.

Po ashtu, janë proceduar penalisht 14 persona të tjerë.

Aksioni

Policia njoftoi se, në bazë të informacioneve të marra në rrugë operative se në rrugën “Konferenca e Pezës”, në katin e dytë të një pallati, në një ambient ushtrohej veprimtaria e kundërligjshme e lojrave të fatit dhe konsumohej lëndë narkotike kanë organizuar punën duke ushtruar kontroll në këtë ambient.

Si rezultat u kapën dhe u  arrestuan në flagrancë:Ardi Muçaj, 45 vjeç; Vangjush Manaj, 40 vjeç dhe Gazment Kajolli, 45 vjeç, të tre banues në Tiranë.

LEXO EDHE  A i kërkoi Metës shtyrjen e zgjedhjeve lokale? Ja si përgjigjet Basha

Arrestimi i tyre u bë pasi në ambientin e marrë me qera nga Manaj dhe punonjës Muçaj, efektivët e Policisë konstatuan 14 persona duke ushtruar veprimtarinë e kundërligjshme e organizimit të lojrave të fatit. Këta shtetas në përfundim të veprimeve u proceduan në gjendje të lirë.

Ndërsa Gazment Kajollit (klient), gjatë kontrollit fizik iu gjet dhe sekuestrua në cilësinë e provës materiale një sasi lënde e dyshuar narkotike e llojit kokainë.

Gjatë kontrollit të ambientit, u gjetën dhe u sekuestruan në cilësinë e provës materiale 21.900 € dhe 90.800 lekë të rinj, lëndë narkotike kokainë, dy tavolina pokeri, katër valixhe me çipsa dhe dy aparate celular.