Një biznesmen 90-vjeçar nga Palermo, me lidhje të kahershme me mafian, cilësohet koka e skemës së pastrimit të parave që çoi në pranga dy persona në Shqipëri, ndërsa u shpall në kërkim biznesmeni Rezart Taçi.
Mediat italiane japin detaje lidhur me aksionin që përfshiu si autoritetet italiane ashtu edhe ato shqiptare.
Më herët, SPAK njoftoi shpalljen në kërkim të biznesmenit të naftës Rezart Tacci dhe arrestimin e dy bashkëpunëtorëve të tij, Artur Balla dhe Bledar Lilo.
“Janë mbledhur prova se kjo skemë financiare është drejtuar nga shtetasit italian F.Z. dhe I.Z., në bashkëpunim me shtetasin italian F.P., të shtetasit zviceran me origjinë italiane D.C., si dhe të shtetasit shqiptar Rezart Taçi, i përfshirë në biznese në sektorin e naftës”, bëri me dije SPAK.
Italiania “ANSA”, në një artikull të publikuar këtë të Premte, zbardh identitetet e personave që drejtuan skemën, sipas hetuesve.
F.Z. është Francesco Zummo, një sipërmarrës 90-vjeçar nga Palermo, partner i ish-kryebashkiakut mafioz pjesë e Cosa Nostra-s, Vito Ciancimino. Zummo, i cili përfundoi në arrest shtëpiak, cilësohet një emër i njohur në botën e krimit të Itali, ndërsa raportohet se është hetuar edhe nga Giovanni Falcone.
Djali i tij Ignazio Zummo është nën akuzë lidhur me çështjen. Po ashtu, raportohet se urdhër-arresti është lëshuar dhe për italianin tjetër Fabio Petruzzella, ekonomist dhe vëllai i një gjyqtari në Palermo.
Në njoftimin e saj, Prokuroria e Posaçme informon po ashtu se “gjatë hetimeve paraprake të kryera lidhur me këtë procedim penal është vendosur masa e sekuestrimit për shumën monetare prej 18,399,941.50 (tetëmbëdhjetë milion, e treqind e nëntëdhjetë e nëntë mijë, e nëntëqind e dyzet e një, pikë pesëdhjetë) Euro”.
Shuma monetare, sipas ANSA-s, është sekuestruar në muajin Gusht, nga një bankë greke e nivelit të dytë në Tiranë.
Lexo edhe:
Pastrimi i parave/ Sekuestrohen 18 mln Euro, 2 në pranga, në kërkim biznesmeni i naftës
Të besuarit e Taçit në skemën e pastrimit të 18 mln eurove/ Kush është djali i ish-gjyqtares
SPAK nxorri urdhër-arrestin, reagon Rezart Taçi: Akuza të pabaza, ja çfarë do bëj
