Prokuroria e Tiranës ka sekuestruar në bashkëpunim me policinë disa pasuri të Dritan Betit dhe personave të lidhur me të.
Ky i fundit është dënuar për trafikim droge në Itali.
Atij i janë sekuestruar pasuri të paluajtshme dhe të luajtshme, që dyshohet se janë vënë me burime të përfituara në mënyë të paligjshme. Ndër pasuritë e sekuestruara janë tre apartamente, një sipërfaqe truall, një Bar-Kafe dhe një palestër.
Dritan Beti u arrestua një vit më parë me qëllim esktradimi drejt shtetit italian. “Nga Seksioni i Kërkimit në DVP Tiranë, në bashkëpunim me Seksionin për Hetimin e Narkotikëve dhe me Interpol Tirana, në vijim të punës për kapjen e personave në kërkim ndërkombëtar, në bazë të informacioneve të siguruara në rrugë operative, në rrugën ‘Shemsi Haka’ u kap dhe u ndalua shtetasi në kërkim ndërkombëtar Dritan Beti, 49 vjeç, banues në Tiranë. Ky shtetas ishte shpallur në kërkim ndërkombëtar, pasi Gjykata e Ankonës, Itali, e ka dënuar me 8 vite burg, për veprën penale ‘Trafikim i narkotikëve’”, njoftonte asokohe policia e kryeqytetit.
