Deputeti Oerd Bylykbashi u shpreh mbrëmjen e sotme në emisionin “Opinion” se statuti i Partisë Demokratike nuk parashikon që firmat e delegatëve që kërkojnë mbledhjen e Kuvendit Kombëtar të verifikohen nga ekzekutivi i kësaj partie.
Bylykbashi tha se statuti i PD parashikon që verifikimi i mandateve bëhet vetëm nga Komisioni që ngrihet nga Kuvendi.
“Asnjë nga ata që sot janë në ekzekutivin e PD nuk janë zgjedhur në pozicionet e tyre në përputhje me statutin e PD, i cili parashikon zgjedhje me votim të mbyllur dhe me kandidatë alternativ. Nënkryetarët dhe Sekretari i Përgjithshëm janë zgjedhur me votim të hapur, pra duke shkelur statutin e partisë.
Firmat janë depozituar te Kryetari i Këshillit Kombëtar të PD, i cili është forumi më i lartë mes dy Kuvendeve Kombëtare. Nëse dikush do të verifikojë nëse janë plotësuar shifrat, pra janë firmosur formularët, mund të shkojnë të bëjnë kontrollin në zyrën e Edi Palokës. Janë depozituar firmat e 4200 delegatëve, nga 1800 që duheshin”, tha Bylykbashi.
Ai tha se z. Basha mund të shkojë në zyrën e z. Paloka dhe të shikojë firmat, le ti verifikojë edhe pse nuk ka kompetencë.
“Edhe Kushtetuta parashikon që nëse Presidenti nuk cakton datën për mbledhjen e Kuvendit, atëherë është vetë Kuvendi që vetëmblidhet”, tha Bylykbashi.
Sipas tij, kryetari i partisë do të mbajë përgjegjësi për të gjithë këtë situatë. Bylykbashi tha se z. Basha dhe kushdo që ka funksion zyrtar e ka për detyrim që të vijë në Kuvendin Kombëtar të PD më 11 dhjetor.
“Nëse nuk vjen le të mbajë vulën në xhep, por ato që do të vendosin janë demokratët. Gjithë ky agresivitet do të toksikojë PD”, tha Bylykbashi.
