Ish-Kryeministri Sali Berisha dhe bashkëpunëtorët e tij, gjatë organizimit të Foltoreve, pritet të depozitojnë në orët e pasdites dosjet me firmat e 4200 delegatëve të Kuvendit kombëtar, që përbëjnë rreth 60 % të numrit total të delegatëve.
Në total, Kuvendi Kombëtar i PD ka 7045 delegatë, ndërkohë që për thirrjen e tij mjaftojnë 15 % e firmave.
Ndërsa pritej depozitimi i firmave gjatë paradites, sikundër raportohet, deri nv orën 15:00, në selinë e PD ende nuk është depozituar dosja.
Depozitimi i firmave duhet të bëhet gjatë ditës së sotme, pasi 30 ditë është afati, sipas procedurave, për verifikimin e dokumentacionit. Nëse nuk depozitohen sot, atëherë vendosen pikëpyetje lidhur me zhvillimin e Kuvendit Kombëtar të PD më 11 dhjetor.
Deri më tani zyrtarisht nga Partia Demokratike nuk është dhënë asnjë sqarim lidhur me procedurat që do të ndiqen për firmat e delegatëve, ndërsa duket se ka një tërheqje nga deklaratat ultimative, sipas të cilave nuk do të kishte asnjë mbledhje forumesh.
Ish-Kryeministri Sali Berisha pritet që në orën 19:00 të dalë në një konferencë për mediat, ndoshta për të parashtruar hapat që do të ndiqen në vijim prej tij, por edhe për të shprehur falenderime ndaj 4200 delegatëve të Kuvendit Kombëtar të PD, që mbështetën nismën e tij, për thirrjen e Kuvendit.
