Deputeti demokrat Oerd Bylykbashi ia ka thënë në sy Kryebashkiakut Erion Veliaj se në Tiranë po investohet paratë e pista me ndërtimet pa kriter, ndërkohë që godinat mbeten të boshatisura.
Gjatë debatit në Komisionin e Ligjeve, ku diskutohet pr/buxheti i Bashkisë së Tiranës, për vitin 2022, Bylykbashi tha se nuk kishte asnjë lloj kërkese të lartë nga qytetarët për apartamente dhe se po shkatërrohej trashëgimia kulturore dhe historike e Durrësit dhe Tiranës.
Bylykbashi foli edhe për rrezikun e centralizimit të pushtetit, pasi në këtë mënyrë pushteti vendor humbet kompetencat e tij dhe nuk mund të ofrojë shërbime për qytetarët.
“Babëzia e ndërtimeve po shkatërron edhe Durrësin, po shkatërron historinë dhe arkeologjinë e këtij qytetit. Paraja kriminale po investohet në ndërtimet në Tiranë dhe jo vetëm, pastrimi i parave po e mban cmimin lart të apartamenteve jo kërkesa.
Se kush janë hallet jo vetëm të bashkisë të Tiranës por edhe të bashkive të tjera, kolegët këtu i dinë dhe nuk është nevoja t’i përmend. Shqipëria nuk është vetëm Tirana.
Ka rënë jo vetëm demokracia, por kemi centralizim. Heqim Tiranën se është shumë e madhe dhe mbledh shumë para. Po ja ku kemi Durrësin që borxhin vetëm të ujësjellësit e ka skandaloz. Janë histori që po cojnë drejt centralizimit të pushtetit.
Kemi bashki që nuk japin dot asnjë shërbim në një territor kaq të vogël në 28 mijë kilometra katrorë. Në të gjithë këtë histori kemi një reformë territoriale, të cilën e kemi si një nevojë therëse për ta bërë pa propagandë dhe por për njerëzit.
Nëse do të merremi edhe me cështjen e pastrimit të parave, nëse fokusi i pushtetit vendor është si të japim sa më shumë leje se ashtu ka më shumë interes, sigurisht që bie interesi në qeverisje. Unë po jap një koment të fundit sepse janë qytetarët që na dëgjojnë. Theksoj se kur bëhen shpronësimet, kurrë mos harroni fondin e dëmshpërblimit të pronarëve të trojeve të cilët ende nuk kanë marrë asnjë dëmshpërblim”, tha Bylykbashi.
