Kategoria Superiore do mbyllë sot javën e tetë me sfidën e Rrogozhinës, aty ku në 13:45 Egnatia pret Vllazinë. Pas këtij dueli, skuadrat e elitës do marrin disa ditë pushim për shkak se luan Kombëtarja. Data 17 nëntor do rikthejë sërish skuadrat shqiptare në fushë, me ndeshjet e kthimit në Kupën e Shqipërisë.
Java e nëntë e Superligës do rikthehet në fundjavën mes 20 dhe 21 nëntorit. Sfida interesante për këtë raund, me kryesuesit e Tiranës që luajnë në transfertë me Kukësin. Pritet që sfida të zhvillohet në “Zeqir Ymerin” e ri, me verilindorët që pas tre vitesh kthehen në shtëpi dhe inaugurojnë stadiumin.
Në sfidat e tjera, Teuta luan me Skënderbeun, Partizani me Laçin, Vllaznia pret Kastriotin dhe Dinamo me Egnatian.
