Kryeministri Edi Rama mbajti qëndrim kritik këtë të Enjte për tre vendet e rajonit që kanë refuzuar “Ballkanin e Hapur”.
“Ballkani i hapur nuk është për 3 vende, por për 6 dhe ndryshe nga Procesi i Berlinit nuk merret dot peng nga asnjë vend, sepse përcakton qartë që cilido prej vendeve që do të ecë më shpejt mund ta bëjë këtë pa pritur një konsensus sikur jemi një karikaturë e Këshillit Europian”, u shpreh Rama nga foltorja e samitit të “Ballkanit të Hapur”, që këtë herë po mbahet në Beograd.
Ai theksoi se Ballkani i Hapur është gjithëpërfshirës dhe s’është vetëm i Serbisë, Maqedonisë së Veriut dhe Shqipërisë.
“Por as Serbia, as Maqedonia e Veriut e as Shqipëria, që duan të ecin më shpejt, nuk do presin të binden të gjithë të tjerët. Arsyet pse të tjerët janë skeptik ose refuzues ndaj Ballkanit të Hapur i kam dëgjuar, i kam dëgjuar dhe arsyet e Malit të Zi edhe arsyet e Bosnjës dhe arsyet e Kosovës dhe më vjen shumë keq, por i konsideroj arsye të mosarsyes. Ballkani i hapur dhe këto takime janë për interesat ekonomike të këtyre vendeve, thatë ju. Pse gjë e vogël ju duken interesat ekonomike të Shqipërisë? Patjetër që jam këtu për interesat ekonomike të Shqipërisë. Pse për ca do jem këtu, për interesat ekonomike të Gjermanisë apo të Kinës, apo kujtdoqoftë tjetër, të cilat drejtpërdrejtë fuqizohen nga Ballkani i Hapur”, shtoi Rama.
Gjatë samitit, ku pjesëmarrës ishin përfaqësues të Shqipërisë, Serbisë e Maqedonisë së Veriut, u tha prej tyre se nisma do të sjellë të mira si lehtësimi i lëvizjes të njerëzve e mallrave, duke i shërbyer kështu ekonomisë.
