Në një prononcim për mediat pas takimit me kreun e Policisë së Shtetit, Gledis Nano, ambasadorja amerikane Yuri Kim u shpreh se bashkëpunimi i fortë me SHBA dhe Shqipërisë për cështjet e ligjzbatimit mbetet i rëndësishëm. Kim theksoi se SHBA do të vijojë të mbështesë policinë shqiptare, ndërsa theksoi rëndësinë që policia të ruajë e të rrisë besimin e publikut.
“Pata një takim shumë të mirë mëngjesin e sotëm me drejtorin e policisë. Erdha për ta uruar dhe për t’i uruar atij suksese në detyrën e re. Për ne bashkëpunimi i fortë mes SHBA-së dhe Shqipërisë për cështjet e ligjzbatimit mbetet i rëndësishëm. Ne do vijojmë të ofrojmë sa më shumë mbështetje të jetë e mundur. Folëm gjithashtu edhe për rëndësinë që policia të ruajë e të rrisë besimin e publikut. Z.Nano dhe unë jemi mbëhstetës të fortë të prezencës së policisë. Dhe e dimë që punonjësit e policisë së shtetit ndërrmarin rreziqe të mëdha madje edhe duke humbur jetën e tyre për të ruajtur ligjin e rendin. Disktuam rëndësinë se si ligjzbatimi të ruhet nga cdo lloj ndikimi nga jashtë,” u shpreh ambasadorja Kim.
Drejtori Gledis Nano falënderoi SHBA-të për mbështetjen dhe u shpreh se lufta ndaj krimit e korrupsionit nuk mund të bëhet asnjëherë vetëm dhe se “bashkë do ia dalim për të pasur më shumë siguri e rend në vend”.
“Sapo zhvilluam një takim me znj. ambasadore në kuadër të bashkëpunimit që Policika e Shtetit ka me të gjitha agjencitë ligjzbatuese të Shteteve të Bashkuara, si partneri ynë strategjik. Ne kemi mbështetje të plotë nga SHBA dhe i sigurova znj. ambasadore se Policia e Shtetit do të jetë në nivelet më të larta të performancës për të luftuar krimin dhe korrupsionin. Kjo është një luftë që nuk bëhet asnjëherë vetëm. Unë jam i bindur që bashkë do t’ia dalim për të pasur rend dhe siguri më tepër në vendin tonë”, tha Nano.
