Nga Boldnews.al
Sapo Gazmend Bardhi paraqiti propozimin për “Vetingun e Politikës” nga SPAK-u, një mekanizëm i menaxhuar më së miri nga qeveria, vendosi para zyrtarit të lartë demokrat prokurorin Alfred Shehu.
Prokurori i Elbasanit, Shehu, është një nga tre kandidatët për dy vende vakante në Strukturën e Posaçme Anti-Korrupsion.
Dhe, me shumë mundësi, ai do të jetë në SPAK, me viston e Këshillit të Lartë të Prokurorisë, i drejtuar ende nga Gent Ibrahimi, një personazh lidhur fuqishëm me maxhorancës socialiste në pushtet.
Prokurori Shehu kishte një profil të ulët deri në Prill të këtij viti, kur u detyrua që të mashtronte publikisht për mos-ekzistencën e materialeve zgjedhore në automjetin e disa militantëve të dhunshëm të Partisë Socialiste.
Prokurori Shehu u bë pjesë e një maskarade të drejtuar nga ish-drejtori i Përgjithshëm i Policisë, Ardi Veliu, kur mohuan në një konferencë për media se në mjetin, i cili u bë shkak për një konflikt të ashpër para-zgjedhor, i pasuar me vdekjen e militantit të majtë Pjerin Xhuvani, nuk kishte asnjë material të kundërligjshëm.
Ky qëndrim i prokurorit, i cili nuk përputhej me faktet, u bë shkak që të ishte në qendër të kritikave të ashpra të Gazmend Bardhit, drejtuesit të fushatës së Partisë Demokratike në Elbasan.
Tashmë, disa muaj më pas, një propozim i Partisë Demokratike për t’i ngarkuar SPAK-ut detyrën e vetingut të politikanëve, mund të vendosë Bardhin sërish para prokurorit Shehu, i cili shpreson për të qenë pjesë e grupit të prokurorëve të posaçëm.
Por, nuk është vetëm Shehu problemi në zbatimin e idesë së opozitës.
Një kandidaturë tjetër për vakancat në SPAK është Elvin Gokaj, për të cilin Komisioni i Pavarur i Kualifikimit (KPK) vendosi që ai duhej të ndiqte për një vit Shkollën e Magjistraturës, për shkak se nuk kishte nivelin e mjaftueshëm profesional.
Një dyzinë tjetër prokurorësh, të cilët po ushtrojnë funksionet në SPAK, janë gjithashtu nën kritika të forta publike, për mungesën e guximit dhe veprimit ndaj korrupsionit të nivelit të lartë.
Me dhjetra kallëzime për inceneratorët, patronazhistët, tenderat sekretë e çështje të tjera të një rëndësie të veçantë, qëndrojnë të fjetura në sirtarët e rinj të Strukturës së Posaçme Kundër Korrupsionit.
SPAK, deri më tani, ka dëshmuar se është një trupë amorfe, e cila nuk arrin të shkojë përtej mediokritetit, duke zhurmuar me arrestime e hetime të korrupsionit në nivelin e ulët,
Ndaj, t’u ngarkosh përgjegjësinë për Vetingun e politikanëve, u jep prokurorëve të posaçëm një ngarkesë më të madhe, duke u dhënë një alibi më shumë për t’u fshehur pas volumit të punës e për të vijuar të mos kryejnë asgjë nga ato për të cilat u krijuan me shumë bujë.
Lëvizja e Partisë Demokratike për “dorëzimin” e verifikimit të figurës së politikanëve në SPAK, mund të jetë edhe një lloj sfide që opozita i bën strukturës më të nanurisur nga Ambasada Amerikane në Tiranë.
Nëse është kjo, atëherë me shumë mundësi janë energji politike të shpenzuara dëm.
Ndërkombëtarët, si në çdo rast tjetër dështimi me reformat e tyre në Shqipëri, ua ngarkojnë përgjegjësinë autoriteteve vendase.
Edhe në rastin e SPAK-ut, për çdo kritikë ndaj prokurorëve të posaçëm, ambasadat e rëndësishme e kërkojnë fajtorin tek politika vendase.
Dhe, si përfundim, idea e opozitës për vetingun e politikanëve nga SPAK do të përfundojë thjesht dhe vetëm në një përballje të Gazmend Bardhit me militantizmin e prokurorit Alfred Shehu apo të çdo “Shehu” tjetër në radhët e prokurorëve të posaçëm.
