Detaje të reja raportohen lidhur me hetimet e call centerave që kanë nisur prej disa ditësh nga SPAK. Prokuroria e Posaçme u ka dërguar letërporosi bankave të nivelit të dytë për llogaritë dhe transaksionet e kryera në 2 vite.
SPAK ka bërë po ashtu kërkesë ndaj drejtorisë së tatimeve për bilancin e këtyre bizneseve, ndërkohë kërkesë i është dërguar edhe kompanive telefonike për thirrjet e kryera ndaj numrave të huaj gjerman, holandez, italian dhe francez.
Mbi 1 mijë shtetas të huaj janë mashtruar, ndërsa dyshohet se u janë vjedhur përmes mashtrimit deri mbi 600 mijë euro investime në bursen e rreme për një person.
Ndërsa në total vlera e mashtrimeve shkon në miliona euro.
Janë mbi 10 kompani që dyshohet se kanë mashtruar me shuma të mëdha një numër të konsiderueshëm qytetarësh të Bashkimit Europian. Hetimet e SPAK janë duke u kryer në kuadër të organizatës kriminale.
Prokurorët e SPAK u vune në lëvizje pas kërkesave nga autoritetet gjermane dhe ato holandeze, pas ankesave nga qytetarët e tyre. Fillimisht hetimet nisën nga këto shtete, ku pas verifikimeve është zbuluar se qytetarët e tyre mashtroheshin nga kompani me IP me qendër në Shqipëri, shkruan Faxweb.
Kujtojme se javën e kaluar drejtuesi i SPAK, Arben Kraja kreu nje vizitë në Holandë, ku bëri një takim me homologun e tij holandez, por nuk dihet se për çfarë kanë biseduar.
Sipas burimeve të rezervuara nga struktura antikorrupsion mësohet se shoqëritë e vënë nën hetim janë call center bursash, punonjësit e te cilëve telefonojnë qytetarë të këtyre shteteve duke iu premtuar se nëse investonin shuma të mëdha në bursë apo në kriptomonedha do të siguronin fitime të konsiderueshme.
