Edith Harxhi, ish-kandidate për kryetare të PD, u shpreh se deri tani janë mbledhur firmat e 70% të anëtarësisë së PD për mbajtjen e kuvendit kombëtar më 11 dhjetor.
“Më 11 dhjetor do të ketë një kuvend kombëtar të PD. Mesa di unë, deri tani janë mbledhur 70% e firmave të anëtarësisë, duke kaluar pritshmëritë. Më në fund, pas 30 vitesh, PD do t’i kthehet të djathtës reale. Do të ketë një analizë të vendimeve të kryetarit në detyrë të Bashës. Do të ketë një votim për statutin e ri dhe referendumin. Do të kthehet referendumi si pjesë e statutit të PD. Zgjedhjet për kryetar do të jenë të parashikuara në një moment tjetër”, tha Harxhi e ftuar në studion A2 News.
Deklaratat e fundit të Bashës, se ai ka mbështetjen e 95% të anëtarësisë së PD, Harxhi i komentoi si skupe mediatike.
“Janë skupe mediatike për të shpëtuar nga ky hall i madh që e ka zënë aktualisht sepse do të ketë edhe ai një mënyrë se si do të dalë nga kjo krizë kaq e madhe, të shpëtojë fytyrën. Do të ketë zhvillime të tilla gjatë javëve të ardhshme që do të sjellin largimin e Bashës nga karrigia që ai mban”, u shpreh Harxhi.
