GJKKO la në fuqi masat e sigurisë për të arrestuarit lidhur me tenderin 7 milion lekë në Bashkinë e Durrësit.
GJykata vendosi “arrest në burg” për shtetasit Patriot Beqaraj, Gjergj Markola, Indrit Matmuja, Adriatik Velaj, Muhamed Likaxhiu, Artan Taho, Riza Sulaj, Albion Bushi.
Ndërkohë në “arrest shtëpie” është dhënë për shtetasen Lulzime Rami dhe “detyrim për t’u paraqitur në policinë gjyqësore” për shtetasen Elona Rami.
Në seancën e zhvilluar me dyer të mbyllura, të arrestuarit pretenduan se nuk kanë lidhje me këtë tender dhe se kanë kryer vetëm detyrën. Sakaq, trupa gjykuese pranoi kërkesën e prokurorisë.
Tenderi 7 milion lekë për shkallët e zjarrfikëses çoi në arrestimin e tetë personave, mes tyre gjashtë zyrtarë në bashkinë e Durrësit. Operacioni u zhvillua nga Prokuroria e Posaçme.
Sipas SPAK, këta persona në bashkëpunim me njëri tjetrin kanë manipuluar garën për tenderin me vlerë të fondit limit prej 7 083 000 lekë në periudhën Maj-qershor 2020 për blerje autoshkalle për mbrojtjen nga zjarri dhe shpëtimin.
