Një sërë çështjesh pritet që të diskutohen në seancën plenare të Kuvendit që pritet të mblidhet këtë të enjte në orën 10:00.
Deputeti Ferdinand Xhaferraj ka kërkuar interpelancë me zv/kryeministrin dhe ministrin e Shtetit për Rindërtimin dhe Programin e Reformave, Arben Ahmetaj. Deputeti demokrat do t’i kërkojë llogari zv/kryeministrit për një fond të përdorur për rindërtimin në Durrës.
Më pas diskutimet do t’i lenë vendit dy projektligjeve të rëndësishme, ai për eurobondin dhe për marrëveshjen e huasë ndërmjet OSHEE dhe BERZH për reagimin ndaj krizës së energjetike.
Debat do të ketë edhe për projektiligjin për miratimin e buxhetit faktik të vitit 2020. Një ndër pikat kryesore të diskutimeve në parlament do të jetë ajo për ngritjen e Komisionit Hetimor për inceneratorët.
Në fund është parashikuar një hapësirë për të diskutuar për çështje që janë jashtë rendit të ditës. Edhe seanca plenare e sotme do të zhvillohet nën rregullat e panemisë.
