“Shqipëria dhe aq më shumë Partia Demokratike, nuk e ka luksin të krijojë një përplasje me SHBA”, shprehet deputetja demokrate Flutura Açka, ndërsa u pyet nga Faxnews lidhur me përplasjen e krijuar në Partinë Demokratike mes Kryetarit të PD-së, Lulzim Basha, dhe ish-kryeministrit Sali Berisha.
“Nuk e di si e shikoni ju, por për shkak të përvojës ia kam lënë të parëve në front, atyre që kanë më shumë përvojë, pasi ndoshta na duhet më shumë kohë për t’u mësuar me mjedisin në të cilin jemi. Sa i takon foltores së Berishës, unë nuk mund të komentoj shumë, sepse më duket një konflikt që lindi për një arsye ekstra-politike, ekstra demokratike.
Një konflikt që na erdhi si nga jashtë dhe është një konflikt mes liderit historik dhe atij të ri. Demokratët ende nuk janë mësuar me këtë konflikt. Do të duhet të mësohen që të shohin nëse është i drejtë. Unë akoma nuk kam vendosur. Mes personave konfuzë jam edhe unë, pra nëse është një konflikt i drejtë ose jo. Një gjë është e sigurtë ne nuk mund të bëjmë konflikt me SHBA, sidomos PD e cila ka pas një dashuri ndaj Amerikës”, tha ajo.
Pavarësisht konfliktit, akuzave dhe kundërakuzave mes Berishës dhe Bashës, Açka pohon se baza është bashkë, pavarësisht presionit për t’u pozicionuar.
“Unë mendoj se pavarësisht konfliktit që duket, por është më pak se kaq, PD është një parti që bazën e saj e ka bashkë. Që do të thotë se pavarësisht se duket sikur janë të detyruar të përzgjedhin mes Berishës dhe Bashës kam përshtypje që në esencë në substancë, ata e kanë zgjedhur PD.
Kjo është shumë e sigurtë që ata janë bashkë, të paktën në përceptimin tim duke qënë se jam shumë shpesh me bazën. Personalisht nuk do të më vinte mirë që PD, ti ndodhte ndonjë skizmë, për shkak të kësaj gjëje dhe unë nuk e shoh si një luftë gjelash, por mendoj që do të vijë një moment dhe do të pericipitoj.
Edhe Z. Berisha dhe Z. Basha do të gjejnë një zgjidhje mes tyre, në mos pastaj do të isha shumë e trishtuar të shihja një konflikt të kësaj natyre”, shprehet deputetja.
