Fëmijë dhe adoleshentë janë shtruar në spitalin e Krujës për shkak të helmimit nga uji. Ministrja e Shëndetësisë, Ogerta Manastirliu, gjithsesi e konsideroi situatën të qetë dhe pa komplikacione.
“Qytetarët kanë marrë shërbimin e nevojshëm janë konsultuar. Sot janë paraqitur rreth 60 qytetarë. Kanë marrë shërbim dhe janë nisur për në shtëpi pasi situata shëndetësore s´ka qenë e rënduar, janë edhe disa pacientë të tjerë që janë duke marrë shërbim.
Janë rreth 30 qytetarë, janë edhe adoleshentë fëmijë dhe të rritur.
Pistat? Janë marrë mostrat e ujit dhe ushqimeve, hetimi po bëhet në të gjitha aspektet. Rezultati i analizave mikrobiologjike ka një afat të caktuar, kur të kemi rezultatet do kemi një raport të detajuar”, u shpreh ajo.
Ajo u shpreh se hetimi bëhet në shumë pista që të kemi të kontrolluar të gjithë aspektin e kujdesit shëndetësor.
Personat që kanë shfaqur shqetësime shëndetësore, deri më tani në nivelin mesatar, janë banorë të zonave të ndryshme të Krujës, çka shton dyshimet se kjo situatë është krijuar nga uji që rrjedh në rubinetat e çezmave.
