Pas Ferlutit, një tjetër kompani, rreziikon heqjen e licencës në transportin publik në Tiranë. Bëhet fjalë për kompaninë që zotëron linjën e transportit publik nga Qendra drejt Kopshtit Zoologjik.
Paralajmërimi u dha nga Kryebashkiaku i Tiranës, Erion Veliaj, gjatë një takimi me operatorët e transportit publik në Tiranë.
“Linja e Kopshtit Zoologjik nxjerr nga marmita kancer e kjo s’ka lidhje fare me Covidin, kjo ka të bëjë me mjete të amortizuara, që janë skandal. Ju kam lënë afat deri në datën 30 tetor. Keni dhe 5 ditë kohë; ose ndryshe do humbisni licencën, siç e humbi “Ferluti”, paralajmëroi Veliaj.
Por duket se ashpërsimi i gjuhës së kryebashkiakut lidhur me problemet që ka Tirana me transportin publik, kanë lidhje të drejtëpërdrejtë me faktin se ai është dubluar me urdhër të Kryeministrit Edi Rama, nga ministrja Belinda Balluku.
Kjo e fundit, pak ditë më parë, ndoshta duke shfrytëzuar edhe faktin se Erion Veliaj ndodhej në Izrael, gjatë një takimi me operatorët e transportit, tha “me kërkesë të kryeministrit vëmëndja do të jetë maksimale ndaj operatorëve të transportit, qoftë ato që operojnë në zonën qytetase, qoftë ato që operojnë në zonën ndërqytetase”.
“Bashkia e Tiranës ndan të njëjtin pozicion me ne”, tha Balluku, ndërsa në krah të saj qëndronte nënkryetari i Bashkisë, Arbian Mazniku.
Referuar kësaj situate, ku duket qartë se Rama dubloi Veliajn në çështjen e transportit publik, që u kthye mjaft shqetësuese për qytetarët, duket se Kryebashkiaku sot vendosi të flasë me një tjetër gjuhë, si për të treguar se ai mund të zgjidhë problematikën.
Veliaj tha se do të merreshin disa veprime për të zgjidhur këtë ngërç me qëllim që qytetarët të mos ndikoheshin kaq shumë nga vendimet e marra nga përfaqësuesit e transportit publik. Ai shtoi se do të rishikohej mundësia e rimbursimit të akcizës, TVSH-së dhe gjithashtu edhe fondi prej 1 milion eurosh për të bërë të mundur subvencionimin e operatorëve.
Nuk dihet nëse, pas takimit të sotëm të Veliajt me operatorët e transportit publik, situata mund të përmirësohet, apo sërisht Kryebashkiaku do të dalë në plan të dytë, dhe zgjidhja do të vijë nga ministrja Balluku. Kjo e fundit në takimin e pak ditëve më parë, dëgjoi me mjaft qetësi kritikat e operatorëve ndaj Veliajt, ndërsa e konsideroi problematikën e tanishme si të mbartur, duke hedhur ndoshta, përgjegjësinë pikërisht te Kryetari i Bashkisë së Tiranës.
