Komiteti i Ekspertëve miraton dozën e tretë te të moshuarit dhe vaksinimin e fëmijëve

Komiteti i Ekspertëve i jep dritën jeshile dozës së tretë të vaksinës te personat mbi 60 vjeç, vaksinimit të adoleshentëve mbi 16 vjeç dhe një kategorie të fëmijëve nga 12 deri në 15 vjeç.

Në mbledhjen e kësaj të Premteje, anëtarët e Komitetit Teknik të Ekspertëve thanë se situata e pandemisë është përkeqësuar lehtë, por masat shtrënguese aktuale do të mbeten në fuqi dhe nuk do të ketë shtim të tyre.

Gjatë komunikimit publik, u bë apel për tu vaksinuar dhe u njoftuan disa vendime të reja lidhur me vaksinimin ndaj koronavirusit.

LEXO EDHE  Mbyti gruan, pendohet shqiptari: Kam merakun e fëmijëve

Drejtuesja e komitetit, Mira Rakacolli tha se është miratuar aplikimi i dozës së tretë të vaksinës te personat mbi 60 vjeç, që duhet të injektohet jo më herët se gjashtë muaj nga doza e dytë.

“Fëmijët mbi 16 vjeç do ftohen të vaksinohen në mirëkuptimin e pridnërve dhe rekomandimin e mjekut”, tha Rakacolli.

Po ashtu, ajo rekomandoi vaksinimin e fëmijëve nga 12 deri në 15 vjeç “që kanë ulje të imunitetit”. Edhe në këtë rast, sqaroi ajo, i nevojshëm është miratimi i pridnërve dhe rekomandimi i mjekut pediatër.