Pas reagimit në La Liga, vjen edhe fitorja në Champions League. Barcelona siguroi fitoren e parë në Grupin E duke rikthyer shpresat për një kualifikim më tej teksa mposhti 1-0 Dynamo Kiev në “Camp Nou”.
Katalanasit me shumë të rinj në formacion dhe me Ansu Fati në stol për të mos e rrezikuar nga fillimi fituan minimalisht edhe pse ishin më dominues në fushë.
Fati i takimit u vendos në minutën e 36’ kur Pique në rolin e një sulmuesi çon në rrjetë fluturimthi një top të ardhur nga jashtë zone.
Gjithsesi në pjesën e dytë edhe me aktivizimin e Coutinhos dhe Ansu Fati, madje edhe të Agueros, rezultati mbetet njësoj por në fund vlejnë 3 pikët e para.
Ndërkohë në Grupin G, surpriza Salzburg konsolidon kryesimin me 7 pikë në renditje pas fitores impresionuese 3-1 ndaj Wolfsburg duke u dhënë një leksion “ujqërve”.
Adeyemi në të 3’ dhe dygolëshi i Okafor në 65’ dhe 77’ i dhanë fitoren vendasve teksa Ncmecha shënoi golin e vetëm për Wolfsburg në 15’.
