Dinamo Kiev është ndoshta treni i fundit i Barcelonës për t’u futur në shinat e kualifikimit. Katalanasit, të cilët gjetën paksa qetësi në ndeshjen e fundi të kampionatit, luajnë gjithçka ndaj ekipit ukrainas për shkak se janë të fundit në grup, me asnjë pikë të grumbulluar.
Barca u mposht në sfidën debutuese përballë Bayern dhe më pas erdhi edhe humbja shokuese ndaj Benficas e cila ka vendosur kualifikimin e katalanasve në rrezik serioz.
Shpresat e Kuman janë edhe njëherë te dyshja e sulmit Ansu Fati, Memphis Depay që po kalojnë një formë të mirë, por edhe për faktin se alternativat janë të pakta me mungesa si Dembele, Arauho, Pedri apo Erik Garsia.
Sfidë shumë e rëndësishme është edhe ajo për Manchester United që luan me Atalantën për vendin e parë, por fillimisht për të siguruar vendin e dytë. “Djajtë e Kuq” janë aktualisht të tretët, por përpara tyre ndodhen zviceranët e Young Boys që fitoren e vetme e kanë pikërisht ndaj skuadrës së Solskjaier.
Juventus do të kërkojë të garantojë kalimin në 1/8-at teksa do të vihet përballë rusëve të Zenit. “Zonja e Vjetër” ka dalë fituese edhe ndaj Malmos, por edhe ndaj Chelsea që pretendon vendin e parë. Me të njëjtin mision është edhe Bayern Munchen që ndaj Benfica do të synojë t’i jap fund llogarive me kualifikimin.
