Studentët që nuk janë vaksinuar kundër Covid 19 kanë nisur nënshkrimin e një peticioni për sigurimin e testeve PCR falas për ta.
Eljon Mulgeci, senator i Universitetit të Tiranës, tha se synojnë që brenda kësaj jave ta dorëzojnë pranë Kryeministrisë, Ministrisë së Arsimit dhe asaj të Shëndetësisë.
“Sot u paraqita me një test PCR negativ. Nuk jam vaksinuar akoma. Ky test është shumë i shtrenjtë dhe duhet bërë çdo javë. Kemi menduar të bëjmë një peticion dhe t’ia drejtojmë Kryeministrisë, Ministrisë së Shëndetësisë dhe Arsimit duke kërkuar që studentëve t’u ofrohen teste PCR falas. Peticioni po nënshkruhet nga shumë studentë dhe po punojmë që deri të premten të kemi 5 mijë nënshkrime që ta dorëzojmë pranë institucioneve përkatëse”.
Përqindja më e lartë e vaksinimit në radhët e studentëve i përket vitit të parë Bachelor.
Rektori i UT ka deklaruar se janë vaksinuar rreth 50% e studentëve me një apo dy doza.
Në të njëjtat nivele luhatet situata dhe në Universitetet e tjera.
Për tu ulur në auditore, studentët duhet të paraqesin në hyrje certifikatën e vaksinimit, vërtetim që kanë marrë një dozë, vërtetim nga mjeku që ua pamundëson vaksinimin, vërtetim që kanë kaluar Covid, ose test PCR negativ çdo javë.
Opsioni i mësimit online nuk ekziston./ Oranews
