Gazetarët e kronikës protestuan të hënën ndaj vendimit të Gjykatës së Posaçme për t’i zhvilluar seancat me dyer të mbyllura –një vendim që cenon informimin cilësor dhe të paanshëm të publikut.
Gazetarët e kronikës protestuan të hënën kundër ‘bunkerizimit’ të Gjykatës së Posaçme të Korrupsionit dhe Krimit të Organizuar, pasi kjo e fundit nuk i lejoi ata të ndiqnin seancën gjyqësore të radhës me preteksin e një Akti Normativ të qeverisë për masat anti-COVID, që mbetet në fuqi prej marsit 2020.
Sipas gazetarit të A2 CNN, Armand Bajrami, vendimi për mbylljen e seancave gjyqësore për gazetarët është i pakuptimtë, në një kohë kur stadiumet janë të mbushura me tifozë.
“Gazetarët nuk u lejuan të ndjekin një seancë gjyqësore publike me arsyetimin e masave COVID, edhe pse ne ishim 5 gazetarë, të gjithë të vaksinuar,” tha Bajrami për BIRN.
Ndërsa shumë prej masave për parandalimin e pandemisë janë lehtësuar që prej pranverës së vitit të kaluar, akti normativ që përcakton mbylljen e seancave gjyqësore për mediat dhe publikun vazhdon të mbahet në fuqi.
Prej majit të këtij viti, gazetarët e kronikës e kanë kundërshtuar atë përmes ankesave zyrtare në Këshillin e Lartë Gjyqësor, ku kanë kërkuar që të lejohen të jenë të pranishëm në sallë.
Sipas një letërkëmbimi që BIRN e disponon, në proces është përfshirë edhe gjyqtarja për mediat, Saida Dollani, e cila pas një takimi me zv.kryetaren e Gjykatës së Posaçme, Irena Gjoka, ka shprehur angazhimin për lejimin e mediave në sallë.
“…Drejtuesja e Gjykatës së Posaçme të Shkallës së Parë, në kuadër të menaxhimit të përgjithshëm gjyqësor, u angazhua në marrjen e masave për të mundësuar marrjen e lajmit drejtëpërdrejt nga gazetarët në sallat e gjykimit, duke u respektuar rregullat e sigurisë së shëndetit..,” shkruan Dollani në njërin prej emaileve.
Megjithatë, Gjykata e Posaçme nuk i është përmbajtur angazhimit për transparencë, duke ua vështirësuar punën gazetarëve.
“Puna jonë është bërë shumë e vështirë që nga nisja e pandemisë, ne nuk marrim dot informacion për seanca që janë publike,” tha Glidona Daci, gazetare e Klan News.
Sipas gazetarit të Fax News, Elvis Myrto, gjykata ndjek standarde të dyfishta dhe e përdor si pretekst aktin normativ anti-Covid.
“Gjykata e Posaçme na ka lejuar të ndjekim çështje që u ka interesuar atyre, siç ishte gjyqi për ish-prokurorin Adriatik Llalla, ku jemi futur 30 veta në një sallë, ndërsa nuk na lejon për çështjet e tjera me justifikimin e aktit normativ,” tha ai.
Gazetarët ngrenë shqetësimin se mbyllja e dyerve nga gjykata cënon punën e tyre dhe informimin e drejtë dhe të paanshëm të publikut.
“Kjo cënon në thelb cilësinë e raportimeve dhe informimin e drejtë dhe të paanshëm të publikut, pasi në seancat me dyer të mbyllura mund të ndodhin një sërë situatash, publikimi i të cilave nuk është në interes të asnjërës prej palëve në gjykim,”përfundoi Bajrami. /BIRN/
