Partia Demokratike ka zhvilluar sot mbledhjen e Grupit Parlamentar, ku ndër të tjera u vendos për paraqitjen e 3 nismave në Kuvend, një prej të cilave për zhbërjen e ndryyshimeve të njëanshme Kushtetuese të korrikut, tjetra për vettingun e politikanëve dhe e treta për reformën territoriale.
Por duket se në mbledhje ka pasur pretendime nga të paktën dy deputetë, Edmond Spaho dhe Luan Baçi, të cilët kanë shfaqur mbështje lidhur me Foltoret e organizuara nga ish-kryeministri Sali Berisha.
Sipas burimeve, mësohet se dy deputetët kanë kërkuar informacione nga kreu demokrat Lulzim Basha lidhur me ndryshimet Kushtetuese që do të propozohen dhe diskutimin e tyre në Grupin Parlamentar.
Kërkesat
Edmond Spaho: Të shohim propozimet për ndryshime kushtetuese, të diskutojmë në grup, në organizmat politike të PD dhe mbi këto të marrim vendime. Nuk mund të vendoset për ndryshime kushtetuese me afate deri të mërkurën. Kjo nuk është serioze dhe nuk garanton suksesin e PD.
Luan Baçi: Ne që kemi dal në foltore dhe kemi opinione të ndryshme, nuk po pozicionohemi në komisioni, bëhen diferencime. Përpara se të firmosim amendamentet, duhet të kemi informacione paraprake, duhet të shikojmë draftet.
