Kastrioti ka mposhtur 2-0 Skënderbeun në javën e pestë të kampionatit duke gjetur fitoren e parë këtë sezon. Kastrioti kaloi në avantazh në minutën e 65-të me gol të Arbër Bashës ndërsa në minutën e 84-të i sapo futuri në fushë, Rami dhuroi spektakël duke shënuar golin e dytë për skuadrën e Ndreut.
Kastrioti arrin kështu fitoren e parë në kampionat, ndërsa Skënderbeu vazhdon krizën e rezultateve duke mos e provuar ende shijen e fitores këtë sezon.
Në ndeshjen tjetër, Egnatia ka arritur të marrë një fitore të madhe në fushën e Laçit duke mposhtur minimalisht këta të fundit me rezultatin 0-1.
Goli i vetëm i takimit u realizua nga njeriu i momentit në shtëpinë e Egnatias, Pedro Augusto, i cili pasi i dha fitoren ndeshjen e kaluar në frymën e fundit ndaj Kastriotit, tani ishte deçiziv edhe ndaj kurbinasve duke shënuar pas një aksioni fantastik në kundërsulm dhe me disa kombinime me shokët e skuadrës në minutën e 75′.
Egnatia aktualisht ka korrur suksesin e saj të dytë radhazi dhe renditet me këtë fitore në vendin e dytë në kuotën e 8 pikëve, po aq sa Tirana e vendit të parë dhe Teuta e vendit të tretë. Ndërsa Laçi renditet në vendin e fundit me 2 pikë të grumbulluara.
