Zgjedhje vendore të parakohshme nuk do të ketë dhe votimet e rradhës për bashkitë do të mbahen në vitin 2023. Një konkluzion i tillë arrihet pas konkluzionit të Komisionit të Venecias në përgjigjen që i kthen Gjykatës Kushtetuese, sa i përket ankimimit të Shoqatës së Bashkive të drejtuar nga Voltana Ademi.
Në dokumentin analitik madje, anëtarët e Venecias shprehen se Gjykata Kushtetuese nuk ka kompetence të shqyrtojë pavlefshmërine e zgjedhjeve.
“E drejta e partive të marrin pjesë në zgjedhje nuk është detyrim; bojkoti nuk është i pranueshëm dhe nuk mund të justifikoje cënimin e periodicitetit të zgjedhjeve; bojkoti nuk mund të kthehet në levë të partive për të bllokuar zgjedhjet; e drejta e qytetarëve për të votuar nuk mund cënohet as me justifikimin e pluralizmit”.
Edhe pse në konkluzionin e mëparshëm për veprimtarinë e Presidentit shtyrja e datës së zgjedhjeve nuk konsiderohet shkelje e rëndë kushtetuese, Venecia këtë radhë shton se dhe Kreu i Shtetit nuk mund të anulonte votimet e 30 qershorit.
“Presidenti nuk ka të drejtë të shtyjë zgjedhjet në kushtet e mungesës së bazes ligjore; në këto raste gjykata Kushtetuese mund të konsideroje shtyrjen e zgjedhjeve si antikushtetuese; vendimi i Kolegjit Zgjedhor që konstaton pavlefshmërinë dekretit të Presidentit për shtyrje zgjedhjesh dhe pse s’është objekt shqyrtimi në Gjykatën nuk mund të nënvlerësohet e të mos konsiderohet”.
Partia Demokratike dhe LSI vendosi bojkotimin e zgjedhjeve vendore të 30 qershorit pas djegies së mandateve parlamentare. Pas kësaj në votime u përfshi Partia Socialiste dhe Bindja Demokratike, çka solli që të gjitha bashkitë të ishin nën drejtimin e selisë rozë.
Pas zgjedhjeve, vetëm bashkia Shkodër drejtohet nga Voltana Ademi për shkak se pas akuzave mbi Valdrin Pjetrin, votimet nuk u zhvilluan.
Procesi u atakua në Gjykatën Kushtetuese nga Shoqata e Bashkive e drejtuar nga Voltana Ademi.
Kushtetuesja para se të vendoste mbi këtë çështje kërkoi mendimin e Komisionit të Venecias.
/Ora News/
