Pronari i lokalit godet me thikë 41-vjeçarin

Një plagosje me thikë ka ndodhur në Lushnje, njoftoi ketë të Mërkurë policia. I lënduari është në spital, ndërsa autori u arrestua.

G.D., 41 vjeç mbeti i plagosur dhe u transportua në spital. Punonjësit e spitalit lajmëruan policinë se një person i lënduar ishte paraqitur për të marrë mjekim. Një grup hetimor u ngrit për rastin dhe efektivët arrestuan si autor i plagosjes Agron Dervishi. Ky i fundit, sipas një rindërtimi paraprak të ngjarjes, në lokalin e tij në lagjen “20 Tetori”, pas një konflikti për motive të dobëta, ka goditur me thikë 41-vjeçarin.

Gjatë kontrollit të ushtruar në banesën e Agron Dervishit u gjetën dhe sekuestruan në cilësinë e provës materiale thika me të cilën dyshohet se ka kryer krimin dhe 1 shkop bejsbolli.

LEXO EDHE  Emri/ Rrahu Kryebashkiakun e Selenicës, arrestohet 57-vjeçari

Në vijim të veprimeve, specialistët për Hetimin e Krimeve në Komisariatin e Policisë Lushnjë arrestuan për veprat penale “Vrasje me dashje” e mbetur në tentativë dhe “Mbajtja pa leje e armëve të ftohta” shtetasin Agron Dervishi, 49 vjeç, banues në Lushnjë.

Gjithashtu, u arrestua në flagrancë edhe shtetasi Arjan Tabaku, 55 vjeç, banues në Lushnjë, i cili akuzohet se ka qenë i pranishëm kur ka ndodhur ngjarja dhe nuk ka kallëzuar në organet kompetente krimin e ndodhur.